ရွှေပြည်သာမြို့နယ်က နို့တစ်ကြေးမပေးဘဲပိတ်သိမ်းမယ့် YFAအထည်ချုပ်စက်ရုံနဲ့ပတ်သက်လို့ ဒီဇင်ဘာ၁၂မှာ မြို့နယ်အဆင့် အပြီးသတ်ဆွေးနွေးမှုမှာလည်း အလုပ်သမားတွေကို လျော်ကြေးမပေး အလုပ်မခန့်တာကြောင့် ခုံသမာဓိသို့ဆက်တက်မယ်လို့ အဲဒီအလုပ်သမားအရေးကူညီနေသူတွေဆီကသိရပါတယ်။
" ဒီနေ့ကသုံးချိန်းမြောက်ပါ။ လုပ်ငန်းရှင်က လျော်ကြေးလည်းမပေးနိုင်ဘူး။ နို့တစ်လည်းမပေးနိုင်ဘူး။ အလုပ်လည်းမပေးနိုင်ဘူးလို့ပြောတယ်။ ဒါပေမဲ့သူတို့က ကရုဏာကြေးဆိုပြီး ပထမဆုံးအဆင့်တုန်းကတော့ သိန်း၃၀ပေးမယ်ပြောတယ်။ အကုန်လုံးအတွက်ပေါ့လူ ၁၅၀ ၊ ၂၀၀ခန့်စာကို။ဒုတိယအချိန်းကျတော့ သိန်း၄၀ပေးမယ်ပြောတယ်။ အလုပ်သမားတွေက မဟုတ်ဘူး နို့တစ်ကြေးဆိုနို့တစ်ကြေးလိုချင်တာ ကရုဏာကြေးလိုချင်တာမဟုတ်ဘူး ပြောတော့မပေးနိုင်ဘူးပြောတယ်ဗျ။ နောက်တစ်ခုက အလုပ်ပြန်ခန့်ရင်လည်း သူတို့ကြိုက်တဲ့သူကိုရွေးခန့်မယ်ပြောတယ်။ အလုပ်သမားတွေကလည်း လျော်ကြေးပေးမယ်ဆိုလည်းပေး အလုပ်ပြန်ခန့်ရင်လည်းခန့် အယောက်၁၅၀လောက်ကို တစ်နေ့လူနှစ်ဆယ်နှုန်းနဲ့ လူရွေးစီစစ်ပြီးခန့်မယ်ပြောတယ်။ အလုပ်သမားတွေကလည်းပြန်ခန့်ရင်အကုန် လုံးကိုခန့်ရမှာ အဲလိုရွေး
ခန့်တာတော့မလိုချင်ဘူးဆိုပြီး ခုံသမာဓိကိုလွှဲလိုက်ပါတယ်" လို့ ကူညီဆောင်ရွက်ပေးသူတစ်ဦးက ဆိုပါတယ်။
အဆိုပါစက်ရုံကစက်ရုံပိတ်သိမ်းမှုအတွက် နို့တစ်ကြေးပေးဖို့သို့မဟုတ် အလုပ် ပြန်လည်ခန့်အပ်ပေးဖို့အလုပ်သမားတွေရဲ့တောင်းဆိုမူနဲ့ပတ်သက်လို့ ၂ကြိမ်ညှိ နှိုင်းမှုလုပ်ခဲ့ပြီး ယနေ့ဒီဇင်ဘာ၁၂ရက်နေ့မှာ
နောက်ဆုံးတကြိမ်ဆက်ညှိခဲ့တာဖြစ်ပေမဲ့ အလုပ်ရှင်ကအလုပ်သမားတွေကို လျော်ကြေးပေးတာမရှိသလို လုပ်ငန်းခွင်လည်းပြန်မခန့်အပ်နိုင်ဘူးလို့သာ ဆိုခဲ့တာဖြစ်တယ်လို့သိရပါတယ်။
မြို့နယ်ညှိနှိုင်းဖျန်ဖြေရေးမှာ အခုလို ညှိနှိုင်းမှုအဆင်မပြေတာကြောင့် ခုံသမာဓိအဖွဲ့ဆီဆက်တက်မှာဖြစ်ပြီး အဲ့ဒီစက်ရုံက အလုပ်သမားတွေရဲ့လုပ်ခလစာပေးရာမှာ နိုဝင်ဘာလတစ်လစာရဲ့လစာကို နိုဝင်ဘာ ၂၉ရက်နေ့အထိ လုပ်ပေးခဲ့ပေမဲ့ အငြင်းပွားမှုစတင်ဖြေရှင်းနေခဲ့ရတဲ့ နိုဝင်ဘာကို၃၀ရက်အတွက် အဲ့ဒီတစ်ရက်စာပျက်ကွက်ဟုဆိုကာ ကျွမ်းကျင်းကြေးတွေ Grade ကြေးတွေနဲ့ရက်မှန်ကြေးတွေကိုပါ ဖြတ်ခဲ့တာကြောင့် အလုပ်ရုံနဲ့အလုပ်သမားဥပဒေစစ်ဆေးရေးဦးစီးဌာနမှာ စာတင်ခဲ့တယ်လို့လည်း သိရပါတယ်။
YFAစက်ရုံဟာ အလုပ်သမား ၁၀၀ ကျော်နဲ့လည်ပတ်နေတာဖြစ်ပြီး အထည်အော်ဒါနည်းတဲ့အကြောင်းပြချက်နဲ့ အလုပ်သမားဥပဒေအရ စက်ရုံပိတ်ရန်ကြိုတင်အသိမပေးဘဲ အလုပ်သမားတွေကို နိူ့တစ်ကြေးမပေးဘဲ အလုပ်ထုတ်လိုက်တာကြောင့် အလုပ်သမားတွေကပြန်လည်တောင်းဆိုခဲ့ရာ စက်ရုံဘက်က နိူ့တစ်ကြေးပေးဖို့ငြင်းဆန်နေပြီး အငြင်းပွားမူဖြစ်ပွားနေတာဖြစ်ပါတယ်။
#MyanmarLabourNews
