လာမယ့် အောက်တိုဘာလ ၂၀ ရက်နေ့ (တနင်္လာနေ့)မှာ ကျရောက်တဲ့ ဒီပါဝလီပွဲတော်နေ့ ကို တရား၀င်အများပြည်သူရုံးပိတ်ရက်အဖြစ် အသိပေးကြေညာထားပါတယ်။
အဆိုပါအများပြည်သူ တရားဝင်အလုပ်ပိတ်ရက် ကြေငြာချက်အရ အောက်တိုဘာလ၂၀ရက်နေ့က ဒီပါဝလီပွဲတော်နေ့ဖြစ်ကာ အစိုးရရုံးပိတ်ရက် ဖြစ်တဲ့ တနင်္ဂနွေ အားလပ်ရက်နဲ့လည်းဆက်စပ်နေတဲ့တနင်္လာနေ့ ဖြစ်လို့ ၂ရက်ကြာ ပိတ်ရက်အနားရ နိုင်ကြောင်း သိရပါတယ်။
" ဒီပါဝလီ ရုံးပိတ်ရက် ကိုတရားဝင်ကြေညာထားပါတယ်။ ပိတ်ရက်က၂ရက်ပဲရလို့ ပြီးခဲ့တဲ့နှစ်က ရုံးပိတ်ရက်၃ရက်ထက် ပိတ်ရက်နည်းပေမယ့် ခရီးတိုသွားမယ့် သူတွေလည်းရှိနေကြတယ်လို့ သိရတယ်။စက်ရုံအလုပ်ရုံတွေပိုင်းတော့သေချာမသိဘူး။ဘာလို့လည်းဆိုတော့သူတို့က တနင်္ဂနွေ ပိတ်ရက်တောင် ဂျူတီချပြီး ဆင်းခိုင်းနေတာဆိုတော့ ပိတ်ရက်တရားဝင်ကြေညာတဲ့ရက်ကိုပဲ ယူပြီး ကျန်ရက်တွေပုံမှန်အတိုင်းလည်းသွားနိုင်ပါတယ်။ အဲ့ဒီလိုပိတ်ရက်မှာ အလုပ်ဆင်းခိုင်းရင်တော့ ဒီအလုပ်ရှင်က လက်ညှိုးထိုးခံရမှာပေါ့ အတင်းအကျပ်ခိုင်း သလိုဖြစ်နေတော့လေ"လို့ အလုပ်သမားအရေး ဆောင်ရွက်နေသူတစ်ဦးက သုံးသပ်ပြောပါတယ်။
၁၃၈၇ ခုနှစ်၊ သီတင်းကျွတ်လပြည့် ကျော် ၁၄ရက်(၂၀၂၅ခုနှစ်၊ အောက်တိုဘာလ၂၀ရက်) တနင်္လာနေ့ က ဒီပါဝလီနေ့ဖြစ်တာကြောင့် နိုင်ငံတွင်းက ရုံးတွေရဲ့ပိတ်ရက်နဲ့လွှဲပြောင်းနိုင်တဲ့စာချုပ်စာတမ်းများ အက်ဥပဒေ အရအများပြည်သူအလုပ်ပိတ်ရက်ဖြစ်ကြောင်း စစ်ကော်မရှင် အစိုးရက အမိန်းကြေငြာစာအမှတ်၁၉၀/၂၀၂၅ဖြင့် အသိပေးဖော်ပြထားပါတယ်။
ဒီပါဝလီပွဲတော်နေ့ဟာ ဟိန္ဒူဘာသာဝင် တွေရဲ့ အထွဋ်အမြတ်ထားရာဘာသာရေး ပွဲတော်နေ့ တစ်ခု ဖြစ်ကာ မြန်မာတို့ရဲ့ သီတင်းကျွတ်ပွဲတော်လို ဆီမီးထွန်းပူဇော်မှုတွေလည်း ရှိကြောင်းသိရှိရပါတယ်။
