လက်ရှိထိုင်းနိုင်ငံ ချင်းမိုင်မြို့မှာနေထိုင်ပြီး ထိုင်းရောက်မြန်မာလုပ်သားများအရေးကူညီပေးနေတဲ့ကိုသားကြီး(KTG Helping Hands)နှင့်Myanmar Labour News မှတွေ့ဆုံးပြီးလက်ရှိဖြစ်ပေါ်နေတဲ့အလုပ်သမားရေးရာကိစ္စရပ်များကိုမေးမြန်းဖြစ်ခဲ့ပါတယ်။

MLN- ထိုင်းမှာရှိနေတဲ့အလုပ်သမားတွေရဲ့စစ်အာဏာသိမ်းပြီးနောက်အခက်အခဲတွေကဘာတွေရှိနေလဲခင်ဗျ။

KTG-
လက်ရှိကတော့ထိုင်းရောက်လုပ်သားတွေအနေနဲ့အရင်အစိုးရလက်ထက်က သက်တမ်းကုန်သွားတဲ့ယာယီပတ်(စ်)ပို့တွေသက်တမ်းတိုးဖို့အဆင်မပြေတော့ဘူး။မိခင်နိုင်ငံပြန်ဖို့ကျတော့လဲစစ်ကောင်စီရဲ့ထောက်လှမ်းရေးတွေကပြည်တော်ပြန်တွေကိုအမှတ်၂ဂိတ်ကစောင့်ပြီးဖမ်းတာဆီးတာရိုက်နှက်စစ်ဆေးတာတွေလုပ်နေတဲ့အတွက်မပြန်ရဲကြဘူး။ဒါပေမယ့် CI နဲ့ကတနှစ်ခွဲနေလို့ရနေသေးတယ်ဆိုတော့ခံသာနေသေးတယ်လို့ပြောရမှာပေါ့။

MLN-အမျိုးသားညီညွတ်ရေးအစိုးရနဲ့ရောဘယ်လိုပူးပေါင်းဆောင်ရွက်တာတွေရှိလဲ။

KTG-လက်ရှိ NUG အစိုးရရဲ့အလုပ်သမားရေးဝန်ကြီးဌာနအနေနဲ့တော့ တခြားဒီကအလုပ်သမားရေးအဖွဲ့တွေနဲ့လုပ်ဆောင်နေတာတွေရှိတယ်ထိုင်းကအလုပ်သမားအရေးကို ကွပ်ကဲဆောင်ရွက်ပေးဖို့လုပ်နေတာရှိတယ်လို့သိရပါတယ်။

MLN-လက်ရှိထိုင်းရောက်မြန်မာရွှေ့ပြောင်းလုပ်သားတွေရဲ့လိုအပ်ချက်ကရောဘာတွေရှိမလဲ။

KTG-အစက ဒီမှာစစ်ကောင်စီကခန့်ထားတဲ့အလုပ်သမားသံအရာရှိတွေရယ်စစ်ကောင်စီရဲ့ဝန်ထမ်းတွေရယ်က ဒီကအလုပ်သမားတွေကို CI သက်တမ်းတိုးဖို့နေပြည်တော်ကထပ်လွှတ်လိုက်တဲ့ဝန်ထမ်းတွေနဲ့ပါပြင်ဆင်နေတယ် CI သက်တမ်းတိုးစာအုပ်တအုပ်ကိုအလုပ်သမားတယောက်ကဘတ်(၁၀၀၀၀)လောက်ပေးလုပ်ရမှာဆိုတော့ သူတို့ဘယ်လောက်ရသွားမလဲ စဥ်းစားကြည့် တိုကင်တောင်မြန်မာငွေတသိန်းပေးယူရတာဗျာ အဲ့တော့ NUG အစိုးရအနေနဲ့လက်ရှိအလုပ်သမားတွေကိုင်ထားတဲ့ပတ်စပိုစ့်နဲ့ပဲတနှစ်ခွဲနေလို့ရတာကိုသက်ဆိုင်ရာထိုင်းအစိုးရနဲ့ညှိစေချင်တယ်။ပြီးတော့စစ်ကောင်စီက CI သက်တမ်းတိုးပြီးငွေရှာမယ့်ကိစ္စကိုအမြန်ဆုံးကန့်ကွက်တားဆီးပေးစေချင်တယ်။

MLN-ပြည်တွင်းကနေထွက်ခွာပြီးထိုင်းဖက်ကိုခိုးဝင်လာပြီးဖမ်းဆီးခံထားရတဲ့အလုပ်သမားတွေရဲ့အခြေအနေကရော။

KTG-ဖမ်းခံရတာတွေက ဘုရားသုံးဆူဖက်ကများတယ်၊ တချို့လဲလွတ်ပေမယ့်တခါဖမ်းရင် သုံးလေးရာဆိုတော့ဒီမှာသောင်းကျော်နေပြီတချို့ကျတော့လဲအချုပ်မှာခနလောက်နေရပြီးမြန်မာနယ်စပ်ကိုပြန်ပို့ခံရပေမယ့် တချို့ကျတော့လဲဘန်ကောက်ထောင်ကြီးရောက်သွားကြရတယ်။တချို့ဆိုတနှစ်နီးပါးခုထိမပြန်နိုင်သေးတဲ့သူတွေရှိနေတယ်။ဒါတွေကိုလဲ NUG အစိုးရအနေနဲ့ဘယ်လိုအမြန်ဆုံးဆောင်ရွက်ပေးနိုင်မလဲဆိုတာစဥ်းစားဖို့လိုပါတယ်။ဟိုဖက်ပြန်ပို့ဖို့ကလဲလုံခြုံမှု့တစက်မှမရှိဘူး။ဒီမှာဖမ်းဆီးခံထားရတဲ့လုပ်သားတွေရဲ့အကြောက်တရားကိုအရင်ဆုံးဖြေရှင်းပေးဖို့လိုတယ်။

MLN- ပြည်တွင်းမှာလဲအလုပ်အကိုင်ရှားပါးမှု့တွေဖြစ်နေတဲ့အပြင် နိုင်ငံရေးကလဲမကောင်းတော့ပြည်ပထွက်ခွာလိုတဲ့လုပ်သားတွေအပေါ်ရောဘာများသတင်းစကားပေးချင်ပါသလဲ။

KTG-ခုလတ်တလောထိုင်း-မြန်မာနယ်စပ်မှာကစစ်ရေးပြင်းထန်နေသလို ထိုင်းစစ်တပ်ကလဲတင်းကြပ်ထားတယ်၊ ကျတော်တို့လဲပြည်တွင်းအခြေအနေဘယ်လောက်ဆိုးဝါးလဲဆိုတာ သိပေမယ့်ပြည်တွင်းကလုပ်သားတွေကိုပြောချင်တာ ခဏလောက်သည်းခံကြပါလို့ ဒီရောက်လို့အဖမ်းခံရရင် မိသားစုတွေနဲ့အဆက်ပြတ်ဘာမှမသိဖြစ်ကုန်ပါလိမ့်မယ်။ ရတဲ့လစာလေးနဲ့မိမိအသက်အန္တရာယ်လုံခြုံတယ်ဆိုရင်တော့ခဏလောက်သည်းခံပေးကြပါလိုပြောချင်ပါတယ်။

MLN-ဖြည့်စွက်ပြီးပြောချင်တာလေးရှိရင်ပြောပေးပါအုံး။

KTG-ဖြည့်စွက်ပြောချင်တာကတော့ NUG အစိုးရအနေနဲ့ PDF တွေ CDM ဝန်ထမ်းတွေအလုပ်သမားရေးကိစ္စဆွေကိုမြေပြင်အခြေအနေမှာဖြစ်ပေါ်နေတာတွေနဲ့ယှဥ်ပြီးအမြန်ဆုံးဆောင်ရွက်ပေးဖို့နဲ့သက်ဆိုင်ရာကျွမ်းကျင်သူတွေနဲ့ပူးပေါင်းပြီးဖြေရှင်းပေးဖို့ပြောချင်ပါတယ်။

ခုလိုအချိန်ပေးပြီးဖြေကြားပေးတဲ့အတွက် MyanmarLabour News ကကျေးဇူးတင်ပါတယ်။