လှိုင်သာယာမြို့နယ် စက်မှုဇုန်(၂) ဆရာစံလမ်းရှိ THA SHU MRANMAR APPAREL CO,LTD စက်ရုံရှိ အလုပ်သမားများဟာ တစ်နေ့လုပ်ခ ၃၆၀၀ ကျပ်သာရရှိနေပြီး အလုပ်သမားတွေကိုလည်း ဥပေဒမဲ့အလုပ်ထုတ်ပယ်တာတွေပြုလုပ်နေတယ်လို့ ယင်းစက်ရုံအလုပ်သမားများထံမှ သိရပါတယ်။
အဆိုပါစက်ရုံမှာ အလုပ်သမားဦးရေသုံးရာကျော်ဖြင့် Rabrab တံဆိပ်ချုပ်လုပ်နေတဲ့ တရုတ်လူမျိုးပိုင်ဆိုင်တဲ့ စက်ရုံဖြစ်ကာ စက်ရုံအလုပ်သမားတွေအပေါ်မှာ အလုပ်သမားအခွင့်အရေး ချိုးဖောက်မှုတွေရှိနေတာဖြစ်တယ်လို့ သိရပါတယ်။
စက်ရုံ လုပ်ငန်းခွင်ထဲမှာ ၃ လပြည့်ပြီးသော အလုပ်သမား အများအပြားရှိပြီး ထိုအလုပ်သမားတွေကို ဒေးကြေး (၃၆၀၀) ကျပ်ဖြင့် ခိုင်းစေတဲ့အပြင် စက်တင်ဘာ ၁၇ရက်နေ့က လုပ်သက် (၆) လရှိသော အလုပ်သမား (၁၀) ဦးကျော်ကို ကြိုတင် ပြောကြားခြင်းမရှိဘဲ အကြောင်းပြချက်မရှိ နစ်နာကြေး တစ်စုံတစ်ရာ မပေးဘဲအလုပ်မှ ထုတ်ပယ်ခဲ့တယ်လို့ သိရပါတယ်။
စက်ရုံတွင် အလုပ်သမားများ ခံစားခွင့်ဖြစ်တဲ့ ရှောင်တခင်ခွင့်များ အလုပ်ရှင်ဘက်မှ မပေးခြင်း၊ ခွင့်မပေးလို့ ရက်ပျက်လျှင် ဒေးကြေး+ရက်မှန်ကြေး (၁၄၈၀၀)ကျပ် ဖြတ်တောက်ခံရပြီး ခွင့်ယူလျှင်လည်း အောစူပါ၊ စူပါများက သူတို့နဲ့ အဆင်ပြေတဲ့ အလုပ်သမားမှသာ ခွင့်ပေးပြီး မကြိုက်တဲ့ အလုပ်သမားများ ခွင့်မပေးဘဲ အလုပ်သမား အချင်းချင်း ခွဲခြားဆက်ဆံခြင်းလည်း ခံနေရတယ်လို့ သိရပါတယ်။
ဒါ့အပြင် အလုပ်သမားများကို စံချိန်တောင်းခံရာမှာလည်း အလုပ်သမားများ မချုပ်နိုင်တဲ့ စံချိန်ကိုတောင်းခံပြီး စံချိန်မပြည့်လျှင် တနင်္ဂနွနေ့မှာ အချိန်ပိုအိုတီအလကား ဆင်းပေးရတာတွေအကြောင့်ယင်းစက်ရုံအလုပ်သမားများအနေနဲ့ အချိန်ပိုအိုတီ အလကားဆင်း ပေးခိုင်းခြင်း မပြုလုပ်ရန် နှင့် ၃လပြည့်ပြီးသော အလုပ်သမားကို ဒေးကြေး ၄၈၀၀ကျပ် ပေးရန်၊ အလုပ်သမားတစ်ဦး ချုပ်လုပ်နိုင်သော စံချိန်ကိုသာ တောင်းခံရန်၊ အလုပ်သမား အချင်းချင်း ခွဲခြားဆက်ဆံခြင်း မပြုလုပ်ရန်၊ ဥပဒေမဲ့ အလုပ်ထုတ်ခြင်းများ မပြုလုပ်ရန်၊ အလုပ်ထုတ်ထားသော အလုပ်သမားများ အလုပ်ပြန်ခန့်ရန်စတဲ့ တောင်းဆိုချက်တွေကို တောင်းဆိုလိုတယ်လို့ အလုပ်သမားတွေကပြောပါတယ်။
MyanmarLabourNews
