စစ်ကိုင်းတိုင်း၊ ထီးချိုင့်မြို့နယ်အတွင်းက တကောင်းတောင် နီကယ်စက်ရုံကို သွယ်တန်းထားတဲ့ လျှပ်စစ်ဓာတ်အားလိုင်းတွေ ကို ဖျက်ဆီးခံလိုက်ရပြီးတဲ့နောက် စက်ရုံလည်ပတ်မှုကို ရပ်နားထားကာ အလုပ်သမားအများအပြားကိုလည်း အလုပ်ကရပ်နားထားသလို လုပ်ခလစာတွေလည်း လျှော့ချထားတယ်လို့ သိရပါတယ်။
နီကယ်စက်ရုံမှာ ကုန်ကြမ်းဌာန၊ သဲမီးဖိုဌာန၊ သတ္ထုရည်ကြိုဌာန၊ ဓာတ်ခွဲခန်းဌာန၊ လုံခြုံရေးဌာန၊ စားဖိုဌာန၊ စိမ်းလန်းဌာန၊ ကားကြီးဌာန စတဲ့ လုပ်ငန်းခွင်တွေရှိပြီး စက်ရုံလည်ပတ်ခြင်းမရှိတဲ့နောက် အလုပ်သမားဦးရေရဲ့ ၄ပုံ ၃ပုံခန့်ကို ရပ်နားထားတာဖြစ်တယ်လို့ သိရပါတယ်။နီကယ်စက်ရုံမှာ အလုပ်သမားပေါင်း ၁၂၀၀ ခန့်ရှိတယ်လို့လည်း သိရပါတယ်။
အလုပ်ကနေ ရပ်နားခံထားရတဲ့ အလုပ်သမားတစ်ဦးက"စက်ရုံကို အခုဆင်းတဲ့သူတွေက လုံခြုံရေးသဘောမျိုးနေရတာ၊ဌာနမှာရှိတဲ့ပစ္စည်းတွေစောင့်ရင်းနဲ့လေ၊ ပျောက်မှာစိုးလို့နဲ့၊ ပြုပြင်ရေးဆိုလား အဲ့လိုမျိုးထားတာပဲ"လို့ပြောပါတယ်။
အလုပ်သမားခေါင်းဆောင်တွေ၊ လုံခြုံရေး အစောင့်တွေနဲ့၊ စက်ရုံမီးလင်းရေးလုပ်ဆောင်ရတဲ့ အလုပ်သမားတချို့သာ အလုပ်ဆင်းကြရတယ်လို့ သိရပါတယ်။
အလုပ်သမားခေါင်းဆောင်တွေအတွက် ခေါင်းဆောင်ကြေးကိုလည်း ထက်ဝက်အထိဖြတ်ချထားတယ်လို့ သိရပါတယ်။ အလုပ်သမားအများအပြားကိုတော့ လုပ်သက်အလိုက် အခြေခံလစာပေးထားဆဲဖြစ်ပြီး အလုပ်ဆင်းကြရသူတွေအနေနဲ့ အခြေခံလစာ၊ အချိန်ပိုကြေး၊ ရက်မှန်ကြေး၊ထမင်းစားရိတ် စတဲ့ ပုံမှန်ရခဲ့တဲ့နှုန်းထားရဲ့ သုံးပုံနှစ်ပုံခန့်သာ ရရှိကြတော့တယ်လို့ သိရပါတယ်။
အလုပ်ရပ်နားခံထားရသူတွေထဲက လုပ်သက်နှစ်နှစ် အထက်ရှိသူတွေကို လစာ ၁၇၀၀၀၀ ကျပ် ပေးမှာဖြစ်ပြီး၊ လုပ်သက်နှစ်နှစ်အောက်သာ ရှိကြသူတွေကို လစာ ၁၅၀၀၀၀ ကျပ် ပေးမှာ ဖြစ်တယ်လို့ သိရှိထားကြောင်း နီကယ်စက်ရုံလုပ်သားတွေကပြောပါတယ်။
အလုပ်သမားအများအပြားရပ်နားခံထားရပြီး နယ်ဝေးကအလုပ်လာလုပ်သူတချို့ကလည်း ၎င်းတို့ဒေသကိုပြန်သွားကြတယ်လို့ သိရပါတယ်။
နီကယ်စက်ရုံရဲ့ တာဝန်ရှိသူတွေဟာ စစ်ကောင်စီတပ်ဖွဲ့ဝင်တွေကို တည်းခိုစေတာ ၊ဧည့်ခံပေးတာတွေ လုပ်ခဲ့ပြီး စစ်ကောင်စီနဲ့ မပူးပေါင်းဖို့ အကြိမ်ကြိမ် သတိပေးခဲ့ပေမယ့် မလိုက်နာတဲ့အတွက် စက်ရုံကိုသွယ်တန်းထားတဲ့ လျှပ်စစ်ဓာတ်အားလိုင်းတွေကို ဇန်နဝါရီလ ၇ရက်နေ့မှာ ဖောက်ခွဲဖျက်ဆီးလိုက်တယ်လို့ ဒေသခံပြည်သူ့ကာကွယ်ရေးတပ်တွေက သတင်းထုတ်ပြန်ထားပါတယ်။
