လက်ရှိမှာစားအုန်းဆီဝယ်ယူခွင့်ကိုရပ်ကွက်အလိုက်ဆီစာအုပ်နဲ့ရောင်းချနေတာကြောင့် အဆောင်တွေမှာငှားရမ်းနေထိုင်တဲ့စက်ရုံအလုပ်သမားတွေအခက်အခဲရှိနေပါတယ်။
စစ်ကောင်စီလက်ထက်မှာရာအိမ်မှူးတွေကတစ်ဆင့်အိမ်ထောင်စုအလိုက်ဆီစာအုပ်တွေရောင်းချပြီးမိသားစုတစ်စုကိုကျပ်ငါးဆယ်သားနှုန်းဝယ်ယူခွင့်ပေးနေတာပါ။
ဆီစာအုပ်တွေကိုတော့သန်းခေါင်စာရင်းနဲ့နေထိုင်သူ၊ ဧည့်စာရင်းနဲ့နေထိုင်သူပါ ငွေကြေးနဲ့ဝယ်ယူရတာပါ။
"အရင်ကတော့ဆီကတ်လေးရရင်သူများကိုပိုက်ဆံလေးနည်းနည်းပေးပြီးစုထုတ်ခိုင်းတယ်။နောက်တော့ဧည့်စာရင်းမှာပါတဲ့သူကိုယ်တိုင်လာရမယ်။လက်မှတ်ထိုးရမယ်ဆိုတော့အဆင်မပြေဘူးလေ။စက်ရုံဆိုတာတရက်နားရင်ရက်မှန်ကြေး၊ဒေးကြေး၊အထည်ကြေးအကုန်ထိတာပဲ။စာအုပ်နဲ့လူကိုယ်တိုင်ထုတ်ဆိုတာအဆင်မပြေဘူးလို့"လို့အဆောင်နေစက်ရုံအလုပ်သမားတစ်ဦးကပြောပါတယ်။
ဆီကိုယ်စားလှယ်တွေကစားဆီရောင်းချရာမှာလည်းအကြွေအခက်အခဲကိုအကြောင်းပြပြီးအချိုမှု့န်ထုပ်တွေပူးတွဲရောင်းချတာ၊ အကြွေအစွန်းထွက်ကိုပြန်မအမ်းတာ၊ ဆီကိုသတ်မှတ်ကျပ်သားအပြည့်မပေးတာတွေလည်းလုပ်ဆောင်နေကြပါတယ်။
"စာရွက်ထဲမှာ နံနက်(၆)နာရီကစဝယ်လို့ရပါတယ်တဲ့။ကိုယ်ကလူကြီးဆိုတော့ (၈)လောက်အရောက်သွားတာပေါ။တကယ်ရောင်းတော့(၁၀)နာရီခွဲမှရောင်းတယ်။အကြီးကတော့ ဈေးထဲထိနှစ်ခေါက်သွားလိုက်ရတယ်။အခုမှစပြီးဆီကတ်ရဖူးလို့သွားထုတ်တာ။ဆီစာအုပ်ကော၊ ခွဲတမ်းစာရွက်ကောပါတာတောင်ဈေးရုံးကလက်မှတ်မပါလို့ဆိုပြီးထပ်သွားယူခိုင်းတယ်။တကယ်ဆိုဆီစာအုပ်ကော၊ခွဲတမ်းစာရွက်ကောပါတာကိုလူကတန်းစီစောင့်ပြီးမှမရောင်းနိုင်ဘူးပြောတယ်။အခုကလေ ခေတ်ပျက်မှသူတို့ကတောင်ပြည်သူအချင်းချင်းကိုယ်ချင်းစာစိတ်မရှိတော့ဘူး"လို့ ဆီထုတ်ယူရာမှာအခက်အခဲဖြစ်ခဲ့သူတစ်ဦးကပြောပါတယ်။
လက်ရှိမှာအဆောင်တွေမှာနေထိုင်သူအလုပ်သမားတွေဆီကတ်ထုတ်ယူရာမှာအဆင်ပြေနိုင်ဖို့အတွက်အဆောင်မှူးတွေကကိုယ်စားထုတ်ယူခွင့်နဲ့ပိတ်ရက်တွေမှသာထုတ်ယူနိုင်ဖို့ရပ်ကွက်တချို့မှာညှိနှိုင်းတာတွေလုပ်ဆောင်နေတယ်လို့ရာအိမ်မှူးတချို့ရဲ့ပြောဆိုချက်အရသိရပါတယ်။
