အလုပ်ရှင်၊ အလုပ်သမား အငြင်းပွားတွေကို ဖြေရှင်းပေးဖို့အတွက် စက်ရုံ၊ အလုပ်ရုံတွေမှာ ဖွဲ့စည်းထားတဲ့ အလုပ်သမားရေးရာလုပ်ငန်း ညှိနှိုင်းရေးကော်မတီ(WCC) ဝင်တစ်ချို့ဟာ အငြင်းပွားမှုတွေကို ဆွေးနွေးညှိနှိုင်းမှု မရှိဘူးလို့ အလုပ်သမားဝန်ကြီးဌာန၊ ဒုတိယဝန်ကြီး ဦးဝင်းရှိန်က ဇန်နဝါရီလ (၂၂) ရက်မှာ ထုတ်ဖော် ပြောဆိုခဲ့ပါတယ်။
အလုပ်သမား ရေးရာ လုပ်ငန်းခွင် ညှိနှိုင်းရေးကော်မတီ WCC ဟာ လူဦးရေ အများအပြားနဲ့ လုပ်ကိုင်ရတဲ့ လုပ်ငန်းတွေမှာ အလုပ်သမားရေးရာ အငြင်းပွားမှုတွေကို ညှိနှိုင်းဖြေရှင်းဖို့အတွက် မဖြစ်မနေဖွဲ့စည်းဖို့ အလုပ်သမားဥပဒေမှာ ပြဌာန်းထားတာပါ။
ဒါ့အပြင် အလုပ်သမားသမဂ္ဂ အဖွဲ့တွေပါ ဖွဲ့စည်းနိုင်တယ်လို့ ပြဌာန်းထားပေမယ့် အလုပ်သမားသမဂ္ဂရှိတဲ့ လုပ်ငန်းခွင်တွေ ရှားပါးလာနေပါတယ်။
လက်တွေ့မှာတော့ စက်ရုံ၊ အလုပ်ရုံတွေမှာ ဖွဲ့စည်းထားတဲ့ အလုပ်သမားရေးရာလုပ်ငန်း ညှိနှိုင်းရေး ကော်မတီ (WCC) အဖွဲ့ဝင်တွေဟာ အလုပ်ရှင်အလိုကျသာ ဖွဲ့စည်းထားတာဖြစ်ပြီး အလုပ်သမား အခွင့်အရေး ချိုးဖောက်မှု တွေကိုပါ လုပ်ဆောင်နေတာပဲ ဖြစ်ပါတယ်။
“WCC ကို ဘယ်တုန်းက ဘယ်လိုရွေးတာလဲကို မသိပါဘူး။ အဖွဲ့ဝင်တွေကိုလည်း မသိဘူး။ အခွင့်အရေး ချိုးဖောက်တာတွေ လုပ်ဆောင်နေပေမယ့် ရှိတဲ့ WCC က လူတွေကလည်း မဆိုင်သလို နေတယ်။ အခုက ဖွဲ့ပြီးတဲ့ သမဂ္ဂတွေကို အကုန်ဖျက်ဆီးပြီး အလုပ်ရှင်ဘက်က တစ်ဖက်သတ်ရပ်တည်တဲ့ဟာတွေပဲ ဖွဲ့ထားတာပါ” လို့ စက်ရုံအလုပ်သမားတစ်ဦးက ပြောပါတယ်။
Myanmar Labour News ကို ဆက်သွယ်ပေးပို့လာတဲ့ အခွင့်အရေး ချိုးဖောက်မှုတွေမှာလည်း WCC အဖွဲ့ဝင်တွေ ဟာ အလုပ်သမားအခွင့်အရေးအတွက် ကာကွယ်ပေးမှု တစ်စုံတစ်ရာ မရှိဘဲ အလုပ်ရှင်ဖက် တစ်ဖက်သတ် ရပ်တည်နေတာကို တွေ့ရှိရပါတယ်။
“ကျွန်မတို့ စက်ရုံမှာ သမဂ္ဂဖွဲ့စည်းထားတာမရှိဘဲ WCC ကော်မတီက အလုပ်ရှင်အလိုကျ လုပ်ဆောင် ပေးနေပါတယ်။ ဥပဒပါခွင့်ရက်တွေကို မပေးပါဘူး။ ကျန်းမာရေး၊ လူမှု ရေးကိစ္စတွေကြောင့် အလုပ်မဆင်းနိုင်လို့ ခွင့်တိုင်ကြားရင် လက်မခံဘဲ သုံးရက်ဆက်တိုက် အလုပ်ပျက်တယ်ဆိုပြီး ဥပဒေမဲ့ အလုပ်ထုတ်နေတယ်လို့ JOYFUL (Myanmar) Garment က အလုပ်သမားတစ်ဦးက ပြောဆိုထားပါတယ်။
လက်ရှိမှာ အလုပ်သမားဝန်ကြီးဌာနဟာ အလုပ်သမားရေးရာလုပ်ငန်း ညှိနှိုင်းရေးကော်မတီ(WCC) အဖွဲ့ဝင်တွေကို စွမ်းရည်မြှင့်တင်ရေး သင်တန်းပေးနေတာတွေ လုပ်ဆောင်နေတယ်လို့ သတင်းထုတ်ပြန်နေပါတယ်။
