စက်ရုံပိတ်သိမ်းစဥ်ပေးရမယ့် နစ်နာကြေးအပြည့်အဝမရရှိတဲ့အတွက်ရန်ကုန်တိုင်း၊ လှိုင်သာယာမြို့နယ်၊ ငွေပင်လယ်စက်မှု့ဇုန်မှာလုပ်ကိုင်နေတဲ့ကျုံစိန့်အထည်ချုပ်စက်ရုံကအလုပ်သမား ၂၀၀၀ နီးပါးအခက်တွေ့နေရတယ်လို့သိရပါတယ်။
ကျုံစိန့်စက်ရုံဟာအော်ဒါပါးတယ်ဆိုတဲ့အကြောင်းပြချက်နဲ့၂၀၂၁ ခုနှစ် ၁၁ လပိုင်းကနေ ယခုနှစ် ၁လပိုင်းအကုန်အထိယာယီပိတ်သိမ်းခဲ့တာဖြစ်တယ်လို့အလုပ်သမားတွေကဆိုပါတယ်။
"ကျတော်တို့ကိုခုထောက်ပံ့ကြေးဆိုပြီးလေးသောင်းပဲပေးတယ် ပြီးတော့စက်ရုံမပိတ်ခင်က လုပ်သက်၆လမပြည့်တဲ့သူတွေဆီကလဲပြန်တောင်းသွားတယ် အလုပ်သမားတွေကလဲအလုပ်ပြုတ်မှာစိုးလို့သာ လတ်မှတ်ထိုးပြီးယူထားလိုက်ရတာမကျေနပ်ကြဘူး"လို့အဆိုပါစက်ရုံမှအလုပ်သမားတဦးကMLNကိုပြောပါတယ်။
အလုပ်ဝင်တဲ့အချိန်ကချုပ်ဆိုခဲ့တဲ့အလုပ်ရှင်အလုပ်သမားစာချုပ်ပါအချက်အလက်အတိုင်းရရှိရမယ့်နစ်နာကြေးမှာတစ်လစာ ၁၄၀၀၀၀ ဖြစ်တဲ့အတွက်အခုလို ၄၀၀၀၀ ကျပ်သာပေးတဲ့အတွက်အလုပ်သမားတွေဖက်က စား၊ ဝတ်နေရေးအတွက် အခက်ကြုံနေကြရတာလို့သိရပါတယ်။
"ခုကစက်ရုံဖက်ကလူလည်ကျမှာ ကျတော်တို့ကိုမောင်းမယ် အော်ဒါတွေတိုးချုပ်ခိုင်းတယ် ပြီးတော့အော်ဒါပါးတယ်ဆိုပြီးအဲ့လိုပဲပိတ်ပစ်မှာ"လို့ကျုံစိန့်စက်ရုံအလုပ်သမားတဦးကဆိုပါတယ်။
စက်ရုံတွေဖက်ကအလုပ်သမားတွေအပေါ်အလုပ်ချိန်တွေတိုးခိုင်းထားပေမယ့် စက်ရုံဖက်ကအလုပ်သမားတွေအပေါ်ရသင့်ရထိုက်တဲ့လုပ်ခလစာ၊ နစ်နာကြေးမပေးတာတွေရှိနေတဲ့အပြင်မကြာခဏဆိုသလိုအော်ဒါမရှိဘူးဆိုတဲ့အကြောင်းပြချက်နဲ့စက်ရုံပိတ်သိမ်းမှာကိုလည်းအလုပ်သမားတွေဖက်ကစိုးရိမ်နေရတယ်လို့ဆိုပါတယ်။
"သူတို့ပေးတော့အလုပ်ပြုတ်မှာစိုးရိမ်တာနဲ့လတ်မှတ်ထိုးပေးလိုက်ရပေမယ့် ကျတော်တို့ကိုစာချုပ်မှာပါတဲ့အတိုင်းသူတို့ဖက်ကအပြည့်ပေးစေချင်တယ်"လို့စက်ရုံပိတ်သိမ်းစဥ်ကာလအတွက်နစ်နာကြေးအပြည့်အဝမရခဲ့တဲ့အဆိုပါစက်ရုံအလုပ်သမားတဦးကပြောပါတယ်။
ကျုံစိန့်စက်ရုံဟာတရုတ်နိုင်ငံသားပိုင်စက်ရုံတစ်ခုဖြစ်ပြီး H&M အမှတ်တံဆိပ်သိုးမွှေးအနွေးထည်တွေကိုအဓိကချုပ်နေတာဖြစ်ပြီးဥရောပနိုင်ငံတွေကိုဖြန့်ချီနေတာဖြစ်တယ်လို့သိရပါတယ်။
