နိုင်ငံသားစိစစ်ရေးကတ်ပြားတွင် တိုင်းဒေသကြီးနှင့်ပြည်နယ်အလိုက် ကိုယ်စားပြု သည့် အမှတ်စဉ်အရ မှတ်ပုံတင် ၅ / နှင့် ၈ / တို့ကို လစာထုတ်ပြီးပါက အလုပ်မှထုတ်ပယ်နေတယ်လို့ စက်မှုဇုန်လုပ်သားတွေကြားမှာ သတင်းတွေ ကျယ်ကျယ်ပြန့်ပြန့်ထွက်ပေါ်နေပါတယ်။
မြန်မာနိုင်ငံက သုံးစွဲနေတဲ့ နိုင်ငံသားစိစစ်ရေးကတ်ပြားမှာ တိုင်းဒေသကြီးနှင့် ပြည်နယ်အလိုက် အမှတ်စဉ်ကိုယ်စားပြုနံပတ်တွေထားရှိပြီး ၅ / မှာ စစ်ကိုင်းတိုင်းနှင့် ၈ /မှာ မကွေးတိုင်း ကိုယ်စားပြု အမှတ်စဉ်တွေ ဖြစ်ပါတယ်။
ရန်ကုန်တိုင်း လှိုင်သာယာမြို့နယ် စက်မှုဇုန် ၄ မင်းဧရာလမ်းမှာဖွင့်လှစ်ထားတဲ့ Myanmar Bestex Garment စက်ရုံမှာလည်း အဆိုပါ ၅ /နှင့် ၈ / တွေကို ဇူလိုင်လစာထုတ်ပြီးပါက အလုပ်မှထုတ်ပယ်မည်ဖြစ်ကြောင်း လိုင်းတာဝန်ခံတွေက တဆင့် အလုပ်သမားတွေကို အသိပေးထားတယ်လို့ အဆိုပါစက်ရုံအလုပ်သမားတွေက ပြောဆိုပါတယ်။
"ဟုတ်တယ် ကျွန်တော်တို့နားမှာခုလေးတင် စက်ရုံက ၅ / အလုပ်သမား ၂ယောက်ကို ပြန်လွှတ်လိုက်တယ်။ ကျွန်တော်တို့လည်း ၅/ တွေပါ ။ ခုကဧည့်စာရင်းတိုင်ဖို့တောင်ခက်နေတယ် ဥက္ကဌ လက်မှတ်ပါမှ ရမယ်လို့လည်းပြောသံကြားတယ် ခုဟာက ၅/ ကိုင်ဆောင်တဲ့လူတွေက ပြည်တွင်းမှာအလုပ်လုပ်တော့လည်း အလုပ်ထုတ်တယ် နိုင်ငံခြားသွားပြန်တော့လည်း ပတ်စပို့ ရုံးမှာ သက်တမ်းတိုးပေးတာတို့ အသစ်လုပ်ပေးတာတို့ မလုပ်ပေးဘူးကြားတယ် အဲ့ဒီတော့ ကျွန်တော်တို့က ဘာဆက်လုပ်ရမှာလဲ " လို့ လှိုင်သာယာမြို့ ၆ ရပ်ကွက် မှာနေထိုင်တဲ့ ပြည်သူတစ်ဦးက ပြောပါတယ်။
သတင်းများအရ ရွှေပြည်သာနှင့် လှိုင်သာယာ မြို့နယ်များသို့ စစ်ကောင်စီမှ စာထုတ်ညွှန်ကြားထားတယ်လို့ သိရပြီး ယင်းကိစ္စထွက်ပေါ်ပြီးနောက်ပိုင်း အဆောင်တွေမှာလည်း အဆိုပါ ၅/ နှင့် ၈/ များကို လက်ခံဖို့ခက်ခဲနေတယ်လို့လည်း သတင်းတွေထွက်ပေါ်နေပါတယ်။
MyanmarLabourNews
