အလုပ်ရပ်ပြီး လုပ်ခတိုးမြှင့်ပေးဖို့ တောင်းဆိုနေတဲ့ ချန်းရိစက်ရုံက အလုပ်သမားတွေ၊ ချန်းရိစက်ရုံတာဝန်ရှိသူတွေနဲ့ အလုပ်သမားဝန်ကြီးဌာနက တာဝန်ရှိသူတွေ သုံးပွင့်ဆိုင် ဆွေးနွေးညှိနှိုင်းမှုတွေ ပြုလုပ်နေတယ်လို့ အလုပ်သမားတဦးက Myanmar Labour News ကို ပြောပါတယ်။
“အခု ညီမတို့ ညှိနှိုင်းတာကို စောင့်နေတာ၊ အလုပ်သမားတွေဘက်က ကိုယ်စားလှယ်ဆိုပြီး ၆ ယောက် လောက် ခေါ်သွားတယ်။ အလုပ်သမားရုံးက လူကြီးနှစ်ယောက်လာတာတွေ့တယ်။ အဝေးကဆိုတော့ သိပ်မမြင်ရဘူး။ သူတို့တွေ ညှိနှိုင်းနေတာကို အလုပ်သမားတွေ စောင့်နေကြတာပါ.”လို့ ဆန္ဒပြရာမှာ ပါဝင်နေတဲ့ အမျိုးသမီးအလုပ်သမားတဦးက ပြောပါတယ်။
မေလ ၁၄ ရက် နေ့လည်ပိုင်းက စတင်ပြီး ချန်းရိ အထည်ချုပ်လုပ်သားတွေက လုပ်ခ ဒေးကြေး တိုးပေးဖို့ အလုပ်ရပ်တောင်းဆိုခဲ့တာ ဖြစ်ပါတယ်။ တောင်းဆိုမှု ၃ ရက်အတွင်း စက်ရုံဘက် လုပ်ငန်းခွင်ဝင်ရောက်လုပ်ကိုင်ပြီး တောင်းဆိုမှုကို စောင့်ဆိုင်းဖို့ကို နည်းလမ်းမျိုးစုံနဲ့ ညှိနှိုင်းခဲ့ပါတယ်။
“စက်ရုံကို ညီမတို့ မယုံကြည်ဘူး။ တောင်းဆိုနေတဲ့ ၃ ရက်အတွင်း တောင်းထားတဲ့ ဒေးကြေးကို ၁၀၀ ရာခိုင်နှုန်း အပြည့်အဝပေးဖို့ အာမ မခံဘူးလို့ ပြောနေတာ။ ပြီးတော့ လုပ်ငန်းခွင်ဝင်ပြီး စက်ရုံဘက်က ဒေးကြေး တိုးပေးတာကို စောင့်ပေါ့ ။ အလုပ်သမား ကိုယ်စားလှယ်လေးယောက်ခေါ်ပြီး စက်ရုံဘက်က ညှိတယ်။ ဒါလည်း အဆင်မပြေဘူး။ သူတို့စောင့်ခိုင်းတဲ့ ၅ ရက်ကို စောင့်မယ်။ လုပ်ငန်းခွင် မဝင်ဘူး။ ” လို့ အဲ့ဒီ အလုပ်သမားက ပြောပါတယ်။
အလုပ်သမားတွေ တောင်းဆိုမှုအတွင်း ညှိနှိုင်းတောင်းဆိုမှုနည်းလမ်းတွေ အသုံးမပြုတာ၊ အလုပ်ရပ်တောင်းဆိုတာကို ပျက်ကွက်မှု၊ ဥပဒေနဲ့ မညီဘူးလို့ HR မန်နေဂျာက ပြောဆိုခဲ့ပြီး လုပ်ငန်းခွင်ဝင်ရောက်ပြီး ညှိနှိုင်းမှု ရလဒ်ကို စောင့်ဆိုင်းဖို့ ပြောဆိုခဲ့ပါတယ်။
“ညီမတို့တောင်းဆိုတာ အပြည့်အဝရရင်တော့ လုပ်ငန်းခွင် ချက်ချင်းပြန်ဝင်ကြမှာ။ လက်ရှိတော့ ဒီတိုင်းဘဲ ဆက်သွားကြမှာ ။ ” လို့ အလုပ်သမားတဦးက ပြောပါတယ်။
ချန်းရိ(Tsang Yih) ဖိနပ်စက်ရုံ အလုပ်သမားတောင်းဆိုမှုအတွင်း လုပ်သား ၆၀၀၀ ပါဝင်နေပြီး စက်ရုံကတော့ ရန်ကုန်မြို့၊ လှိုင်သာယာမြို့နယ်၊ အပြင်ပဒံရပ်ကွက်အနီး၊ အနော်ရထာစက်မှုဇုန်အပိုင်း ၂ မှာ ရှိပါတယ်။
