ကုန်ဈေးနှုန်းတွေအဆမတန်မြင့်တက်နေတာကြောင့်ထောင်ဝင်စာပေးပို့နေရတဲ့ အကျဉ်းသားမိသားစုတွေပိုမိုခက်ခဲလာပြီးထောင်ဝင်စာပို့ဖို့အဆင်မပြေတာတွေရှိလာပါတယ်။
စစ်အာဏာသိမ်းပြီးနောက် မြန်မာနိုင်ငံ အကျဥ်းထောင်တွေမှာ အကြောင်းပြချက်အမျိုးမျိုးနဲ့ဖမ်းဆီးထိန်းသိမ်းခံရသူအရေအတွက်ဟာပိုများလာတာဖြစ်ပြီး ဖိနှိပ်မှုတွေဟာလည်းပိုမိုဆိုးရွားလာတာဖြစ်ပါတယ်။
"ထောင်ဝင်စာကတစ်လတစ်ခါပို့ဖို့ကိုအနိုင်နိုင်ဖြစ်နေတယ်။ဟင်းစားအပေါအပဲလေးတွေပို့တာကိုဈေးကမတရားဖြစ်နေတာ။သွားတိုက်ဆေး၊ ဆပ်ပြာတွေလည်းဈေးတက်တယ်။ယားနာလိမ်းဆေးတွေလည်းပုံမှန်မပို့နိုင်တော့ဘူး။ကော်ဖီကလည်းလိုအပ်တယ်ဆိုပေမယ့်ပါကင်လိုက်မဝယ်နိုင်တော့ဘူး။ဆယ်ထုပ်လောက်ပဲထည့်ပေးနိုင်တော့တယ်"လို့အကျဉ်းသားမိသားစုဝင်တစ်ဦးကပြောပါတယ်။
လက်ရှိမှာအကျဉ်းထောင်တွေမှာနေထိုင်စားသောက်ရေးအဆင်ပြေစေဖို့မိသားစုတွေကထောင်ဝင်စာပေးပို့တာတွေလုပ်ဆောင်နေရတာဖြစ်ပါတယ်။
ထောင်ဝင်စာပေးပို့ရာမှာနှစ်ပတ်တစ်ကြိမ်ပေးပို့ခွင့်ပြုထားပြီးတွေ့ဆုံခွင့်ကိုတော့တစ်လတစ်ကြိမ်ခွင့်ပြုတာဖြစ်ပါတယ်။
"တဖြေးဖြေးတော့ပို့တာတွေနည်းလာတာပေါ့။ဆေးတွေလည်းဈေးကမတရား။ကော်ဖီမုန့်ကလည်းမသက်မသာဆိုတော့အခြောက် အခြမ်းလေးပဲထည့်တော့တယ်။မုန့်ကမပါသလောက်ပါပဲ။အထဲကယောကျာ်းကတော့အဆင်မပြေရင်မပို့နဲ့ပြောပါတယ်။ဒါပေမယ့်အပြင်ကမပို့ရင်အထဲကစားသောက်ရေးခက်ခဲမှာသိနေတော့ဟိုချေးဒီချေးနဲ့ပို့ရတာအထဲကလူကောအပြင်ကလူကော သောကတွေချည်းပဲ"လို့ထောင်ဝင်စာပေးပို့သူတစ်ဦးကပြောပါတယ်။
လက်ရှိမှာအကျဉ်းထောင်တွေမှာဈေးဘားတွေကတစ်ဆင့်ငွေသွင်းပြီးလိုအပ်တာတွေကိုဝယ်ယူခွင့်ရှိပေမယ့်အပြင်ပေါက်ဈေးထက်ပိုပေးရတယ်လို့အကျဉ်းကျသူတွေဆီကသိရပါတယ်။
