ကိုယ်ဝန်သည် အမျိုးသမီးအလုပ်သမားတွေကို အလုပ်စံချိန်မမီဟုဆိုကာ SUN APPAREL ( ဆန်းဧပရယ်) အထည်ချုပ်စက်ရုံ တာဝန်ရှိသူတွေက အလုပ်ကနေထုတ််ပယ်ဖို့ စီစဉ်နေတယ်လို့ စက်ရုံ အလုပ်သမားတွေက ပြောဆိုပါတယ်။
အမျိုးသမီး ကိုယ်ဝန်သည်တွေကို လုပ်အားလျော့လာတာနဲ့ မီးဖွားခွင့်ပေးရမှာတွေကြောင့် လုပ်သက် ၆ လမပြည့်သေးတဲ့ အမျိုးသမီး အလုပ်သမားတွေကို စစ်ဆေးပြီး ကိုယ်ဝန်ရှိပါက အလုပ်ကနေ ရပ်နားခိုင်းနေတယ်လို့ မြန်မာနိုင်ငံ အထွေထွေအလုပ်သမား သမဂ္ဂများအဖွဲ့ချုပ် (FGWM )ရဲ့ လူမှုကွန်ရက် ရေးသားထားပါတယ်။
ရန်ကုန်တိုင်း လှိုင်သာယာမြို့ စက်မှုဇုန်၊ (၅) မလိခလမ်း၊ အမှတ် ၇၈ မှာ လုပ်ငန်း လုပ်ကိုင်နေတဲ့ SUN APPAREL ( ဆန်းဧပရယ်) အထည်ချုပ်စက်ရုံမှာ အလုပ်သမားအခွင့်အရေးတွေ မရရှိဘူးလို့ သိရပါတယ်။
အလုပ်သမားတွေကို ဖိအားပေး ခိုင်းစေနေပြီး မလုပ်နိုင်တဲ့ အထည်စံချိန်ကို အဓမ္မ တောင်းဆိုတဲ့ အလုပ်သမားခေါင်းဆောင်တွေကလည်း အလုပ်ရှင် သဘောကျ လုပ်ဆောင်ပေးနေတယ်လို့ SUN APPAREL ( ဆန်းဧပရယ်) အထည်ချုပ်စက်ရုံ အလုပ်သမားတွေက ပြောပါတယ်။
လုပ်ငန်းခွင်အတွင်း စက်ရုံတာဝန်ရှိသူတွေရဲ့ ဖိနှိပ်တာတွေကြောင့် လစဥ် ဥပဒေမဲ့ အလုပ်ထုတ်မှုတွေနဲ့ လုပ်ခလစာ ဖြတ် တောက်တာတွေရှိနေတယ်လို့ သိရပါတယ်။
SUN APPAREL ( ဆန်းဧပရယ်) အလုပ်သမားတွေက စက်ရုံတာဝန်ရှိသူတွေရဲ့ ဖိနှိပ်မှုနဲ့ အဓမ္မ ခိုင်းစေခံ နေတာတွေကို ဖြေရှင်းညှိနှိုင်းနိုင်ဖို့ အလုပ်သမားသမဂ္ဂ ဖွဲ့စည်းထူထောင်ဖို့ ကြိုးစားတဲ့ အလုပ်သမားတွေကို လည်း အပြစ်ရှာ ဖိအားပေးပြီး အလုပ်မထွက် ထွက်အောင် လုပ်ဆောင်နေတာတွေကြောင့် တာဝန်ရှိသူ တွေကကူညီဖြေရှင်းပေးနိုင်ဖို့ FGWM အဖွဲ့ကို အကူညီတောင်းထားတယ်လို့ သိရပါတယ်။
Source_FGWM
