စက်တင်ဘာ ၂၇ ရက်နေ့ရဲ့ပြင်ပနိုင်ငံခြားငွေကြေးဈေးကွက်အတွင်းအမေရိကန်ဒေါ်လာငွေလဲနှုန်းအရ တစ်ဒေါ်လာလျှင် ၄၈၀၀ ကျပ်အထိ ပြန်လည်ကျဆင်းလာတယ်လို့ ပြင်ပစျေးကွက်ပေါက်စျေးအရ သိရပါတယ်။
"ဒီနေ့က ၄၈၀၀ အမြင့်ဆုံးက ၄၉၀၀။ဒါပေမဲ့ ၄၈၀၀ လောက်နဲ့ပိုအရောင်းဝယ်ဖြစ်တယ်။ online transfer နဲ့ဆိုရင် ၄၇၀၀ လောက်အထိဖြစ်သွားပြီ။ ဒီနေ့ကစျေးကွက်နောက်ဆုံးနေ့ဆိုတော့ ဒီလောက်နဲ့ရှိနေနိုင်တယ်။ လာမဲ့အပတ်တော့မသိနိုင်ဘူး" လို့ လုပ်ငန်းခွင်အတွင်းဒေါ်လာအသုံးပြုသူတစ်ဦးကဆိုပါတယ်။
ယခုတစ်ပတ်တာအတွင်း နိုင်ငံခြားငွေစျေးကွက်ဟာ စက်တင်ဘာ ၂၁ ရက်နေ့ပြင်ပပေါက်စျေးအရ တစ်ဒေါ်လာ ၅၁၀၀ ကျပ်ရှိခဲ့ရာကနေ စက်တင်ဘာ ၂၄ ရက်အထိ ကျပ် ၅၁၀၀ နဲ့ စျေးတန်းငြိမ်နေခဲ့ပြီး စက်တင်ဘာ ၂၅ရက်မှာတော့ တစ်ဒေါ်လာကျပ် ၅၀၀၀ ဖြစ်လာကာ စက်တင်ဘာ ၂၆ရက်မှာတော့ တစ်ဒေါ်လာလျှင် ကျပ်၅၀၀၀ အောက် ရောက်ရှိကာ ၄၉၀၀ ကျပ်မှ ယနေ့ စက်တင်ဘာ ၂၇ ရက်မှာတော့ တစ်ဒေါ်လာလျှင် ၄၇၀၀ ကနေ အမြင့်ဆုံး ၄၉၀၀ ကျပ်အထိ ရောက်ရှိသွားပြီးဆက်လက်၍လည်း အကျဘက်ကိုအားသာနေတယ်လို့ခန့်မှန်းတာတွေရှိနေပါတယ်။
ပြင်ပပေါက်စျေး online transfer အရ တစ်ဒေါ်လာလျှင် ၄၇၀၀ အထိကျဆင်းလာခဲ့ပြီး စစ်ကောင်စီလက်အောက်ခံ ဗဟိုဘဏ်အပါအဝင် လိုင်စင်ရဘဏ်တွေ၊ ပို့ကုန်/သွင်းကုန်လုပ်ငန်းရှင်တွေရဲ့ ဒေါ်လာငွေလဲနှုန်းကတော့ တစ်ဒေါ်လာလျှင် ၃၅၀၀ ဝန်းကျင်နဲ့ အရောင်းအဝယ်ပြုလုပ်ခဲ့ကာ Customer တွေကို ရောင်းပေးတဲ့ ငွေလဲနှုန်းကတော့ တစ်ဒေါ်လာကို ၂၁၀၀ ကျပ်မှ အမြင့်ဆုံး ၄၂၀၀ ကျပ်ဖြစ်တယ်လို့ သိရပါတယ်။
ယခုလိုဒေါ်လာစျေးကျဆင်းလာတာဟာ စက်သုံးဆီနဲ့ စားသုံးဆီလုပ်ငန်းရှင်တွေကို အမေရိကန်ဒေါ်လာ ၄၇ သန်း ထုတ်ရောင်းပေးထားသလို FX Trading Online Platform ကနေ အမေရိကန်ဒေါ်လာ ၆၃ သန်းကျော်ကို ၁၂ ကြိမ် ခွဲရောင်းပေးထားတာကြောင့် ကျဆင်းလာတာလို့လည်း သုံးသပ်ပြောဆိုနေကြပါတယ်။
