“ ဖူးခက်မှာ အလုပ်သမား ၁၅ ဦးလုပ်အားခ မရလို့ ကျွန်တော်တို့ ရုံးကို ကူညီတောင်းလာတယ်။ ဘတ်ရိုက် ပေးမယ်ဆိုပြီး သူဌေးက အမည်စာရင်းတွေ (Name List)တွေလည်းဖျက်ထားတယ်။ တကယ်လည်းကျတော့ သူဌေးက အလုပ်သမားတွေကို ဘတ်ရိုက် မပေးဘူး။ ပိုက်ဆံလည်း မပေးတော့ဘူး။ လုပ်ငန်းခွင်ထဲကနေ မောင်းထုတ်တဲ့အထိ ဖြစ်လာတယ်"လို့ အဲဒီ အလုပ်သမားတွေကို ကူညီဆောင်ရွက်ပေးနေတဲ့ WAG အဖွဲ့ က ပြောပါတယ်။

ဘတ်ရိုက်တယ်ဆိုတာ တရားဝင်အထောက်အထား CI ကတ်ရရှိဖို့ အမည်စာရင်းသွင်းတာ ၊ သွေးစစ်တာ၊ လက်ဗွေ နှိပ်ပြီး ပါမစ်စာရွက်ထုတ်ယူတာ ဖြစ်တယ်လို့ သိရပါတယ်။

အလုပ်ရှင် ထိုင်းသူဌေးက လုပ်ခလစာ အပါအဝင် ဘတ်ရိုက် ပေးမယ်ဆိုပြီး ယူထားတဲ့ ဘတ်ငွေ နှစ်သိန်းသုံးသောင်းကျော်ကို ထုတ်မပေးဘဲ ထိုင်းရဲကို ဖမ်းဆီးခိုင်းတာတွေအထိ ပြုလုပ်ခဲ့တယ်လို့ အလုပ်သမား တွေက ပြောပါတယ်။

ဒါကြောင့် WAG အဖွဲ့ နဲ့အတူအလုပ်သမားတွေက ဖြတ်ယူထားတဲ့ငွေကြေး ဘတ် နှစ်သိန်းကျော် ပြန်လည်ရရှိဖို့ ဖူးခက်မြို့က အလုပ်သမားကာကွယ်ရေးနှင့် လူမှုဖူလုံရေး (ဆာဝဒီကန်) ရုံးကို တိုင်တန်းထားတယ်လို့ သိရပါတယ်။