ရွှေပြည်သာမြို့နယ် ဝါးတရာစက်မှုဇုန် မှာရှိတဲ့ YFA Yangon Fukuyama Apparel အထည်ချုပ်စက်ရုံတာဝန်ရှိသူကိုပြောင်းလဲ တရားစွဲဆိုထားတာနဲ့ပတ်သက်ပြီးတိုင်းတရားရုံးက စေ့စပ်ညှိနှိုင်းဖို့ အမိန့်ချတယ်လို့ အလုပ်သမားဘက်က လိုက်ပါကူညီပေးနေတဲ့ သွေးစည်းညီညွတ်သောသမဂ္ဂများအဖွဲ့ချုပ်(STUM)ထံက သိရပါတယ်။
" ပိုင်ရှင်ကိုယ်တိုင် လာရောက်ခြင်းမရှိဘဲ မန်နေဂျာ ဒေါ်စုမြတ်မြတ်လွင်မှ ကိုယ်စားလှယ်လွှဲစာဖြင့် အမှု့ကို လာရောက် ရင်ဆိုင်ပါတယ်။ယနေ့ရုံးချိန်းတွင် တရားသူကြီးမှ အမှုတွင်ငွေရလိုမှုပါသည့်အတွက် မေလ ၁၉ ရက် တွင် တိုင်းရုံးသို့ စေ့စပ်ညှိနှိုင်းရေး သွားရန်နှင့်အဆင်ပြေသည်ဖြစ်စေ၊ မပြေသည်ဖြစ်စေ ရုံးရှေ့သို့ ဇွန်လ ၂၀ ရက် နေ့တွင်ပြန်လာရန် အမိန့် ချမှတ်လိုက်ပါတယ်" လို့ဆိုထားပါတယ်။
အလုပ်ရှင်ဘက်က အလုပ်ခန့်ထားမှုဆိုင်ရာသဘောတူစာချုပ်ချိုးဖောက်မှုနဲ့ပတ်သက်လို့ YFA စက်ရုံပိုင်ရှင်ကို အလုပ်သမားဖြစ်သူ မအိပိုပိုလှိုင်ကတရားစွဲဆိုခဲ့ရာ တရုတ်နိုင်ငံသားစက်ရုံပိုင်ရှင်က မြန်မာနိုင်ငံမှာရှိမနေတာကြောင့်ဆိုပြီး ရုံးချိန်း ၅ ကြိမ်လုံး ပျက်ကွက်ခဲ့လို့ လက်ရှိစက်ရုံကို တာဝန်ယူထားသူကို ပြောင်းလဲတရားစွဲဆိုမှု ပြုလုပ်ခဲ့တာဖြစ်ပါတယ်။
လက်ရှိမှာတော့ ပြီးခဲ့တဲ့ဧပြီ၂၅ရက်က ပထမဆုံးရုံးချိန်းချိန်းဆိုခဲ့ပြီး ဒီကနေ့ မေ၅ရက်နေ့ကို ပြန်လည်ချိန်းဆိုထားရာ တိုင်းတရားရုံးမှာစေ့စပ်ညှိနှိုင်းပြီး အဆင်ပြေသည်ဖြစ်စေမပြေသည်ဖြစ်စေ မေ၂၀ ရက်နေ့မှာ တရားရုံးသို့ပြန်လည်လာရောက်ရမယ်လို့ ချမှတ်လိုက်တယ်လို့ဆိုပါတယ်။
YFA စက်ရုံက ပြီးခဲ့တဲ့နှစ်ကုန်မှာ အလုပ်သမားမအိပိုပိုလှိုင်ကို လုပ်သက်ခွင့်ရက်တွေ ရယူပြီး အလုပ်ပျက်လို့ဆိုကာ အီးစီစာချုပ်မှာ မပါဝင်တဲ့အကြောင်းပြချက်နဲ့အလုပ်ထုတ်လို့ EC contract အီးစီစာချုပ်ချိုးဖောက်တဲ့အတွက် ရွှေပြည်သာမြို့နယ်အလုပ်သမားရုံးက တရားစွဲဆိုခွင့်စာထုတ်ပေးပြီး အလုပ်သမားကတရားစွဲဆိုနိုင်ခဲ့ခြင်းဖြစ်ပါတယ်။
#MyanmarLabourNews
Photo-သာဓုကန်စက်မှုဇုန်ရှိ YFA စက်ရုံ။
