MyanmarLabourNews
နိုဝင်ဘာ ၇
ကရင်ပြည်နယ်၊ လှိုင်းဘွဲမြို့နယ် ရွှေဂွန်းတိုက်နယ် ရွာသစ်(၁)က BEd နောက်ဆုံးနှစ် ကျောင်းသူ မထူးစံအောင်ကို ပြည်သူ့ကာကွယ်ရေးတပ်ဖွဲ့-PDF တွေကိုကူညီပေးနေသူလို့ ဆိုကာ ပြီးခဲ့တဲ့ နိုဝင်ဘာလ ၆ရက်နေ့ မနက်ကရွှေဂွန်းရဲတပ်ဖွဲ့နဲ့ ဖါးအံ ရဲတပ်ဖွဲ့တို့ ပူးပေါင်းပြီ ဖမ်းဆီးခံရတယ်လို့ ကေအိုင်စီ ကရင့်သတင်းစဉ်ရဲ့ သတင်းထုတ်ပြန်ချက်က သိရပ့ါတယ်။
ဒေသအတွင်း စစ်ကောင်စီက ခန့်အပ်တဲ့ အုပ်ချုပ်ရေးမှူးနဲ့ သတင်းပေးဒလန်တို့ကြောင့် မနေ့ ကမနက် (၆)နာရီဝန်းကျင်က သူမ၏နေအိမ်မှာ ဝင်ရောက်ဖမ်းဆီး သွားခဲ့တာလို့ ဆိုပါတယ်။
“သူတို့မိသားစုဝင်တွေက ဈေးကြီးမှာ ဈေးဆိုင်ဖွင့်ထားတော့ အကုန်လုံးဈေးသွားကြတယ်။ သူအိမ်မှာ တစ်ယောက်ထဲရှိနေတဲ့အချိန် ဖားအံက ရဲနဲ့ ရွှေဂွန်းက ရဲတွေ လာဖမ်းတယ်။ အင်အား တော့များတယ်။ ရွှေဂွန်း အုပ်ချုပ်ရေးမှူး ဟိန်းဇာစိုးနဲ့ ရပ်ကွက်က ဒလန်တွေတိုင်လိုက်တာ။ သူကလိုင်းပေါ်မှာ PDF တွေကို ကူညီနေပေးတယ်ဆိုပြီးတော့ စွပ်စွဲဖမ်းသွားတာ။ သူ့ဖုန်းနဲ့ Laptop ကိုလည်း သိမ်းသွားတယ်။ သူ့ကိုတော့ အခု ဖားအံကို ခေါ်သွားလိုက်ပြီ။”လို့ သိရပါတယ်။
ဒါအပြင် လက်ရှိအချိန်ထိ မိသားစုဝင်များမှ သူမနှင့်အဆက်အသွယ်မရရှိသေးဘူးလို့လည်း ဆိုပါတယ်။
လှိုင်းဘွဲမြို့နယ် ရွှေဂွန်းတိုက်နယ်မှာ ပြီးခဲ့တဲ့ မေလက 'စစ်ကျွန်ပညာရေးအလိုမရှိ' စာသားတွေကို စာသင်ကျောင်းတွေမှာ လိုက်ကပ်တယ်လို့ စွပ်စွဲပြီးလူငယ် ၃ ဦးကို စစ်ကောင်စီရဲတပ်ဖွဲ့က ဖမ်းဆီးတာမျိုး ရှိဖူးတယ်လို့ သိရပါတယ်။
သတင်း CJ
#MyanmarLabourNews
