ပြီးခဲ့တဲ့သြဂုတ်ထဲမှာတော့ဂတ်ဘူးသေးတစ်ဘူးကိုကျပ် ၂၀၀၀ နဲ့ဂတ်စ်တစ်ပိဿာကိုကျပ် ၁၃၀၀၀ အထိ စံချိန်တင် ပေါက်ဈေးရှိခဲ့ပါတယ်။ လက်ရှိမှာဂတ်စ်ဘူးသေးတစ်ဘူးကိုကျပ်(၁၇၀၀)နဲ့တစ်ပိဿာကိုကျပ်(၁၁၀၀၀)ထိ ဈေးနှုန်းပြန်လည်ကျဆင်းလာတာပဲဖြစ်ပါတယ်။
အိမ်သုံးဂတ်စ်(LPG)ဈေးနှုန်းတွေပြန်လည်ကျဆင်းလာပေမယ့် ဈေးကွက်တွင်းမှာအရောင်းအဝယ်အေးနေတယ်လို့ဂတ်စ်အရောင်းဆိုင်ဖွင့်လှစ်ထားသူတွေကပြောပါတယ်။
"အရောင်းအဝယ်ကပါးတယ်။အိမ်တွေက အဝင်၊ အထွက်မမျှတဲ့အခါကျတော့အရင်လိုဘာကိုမှပေါပေါသီသီမသုံးတော့ဘူး။အရင်ကဆိုအမတို့ဆိုင်မှာစက်ရုံအလုပ်သမားတွေအဝယ်များတယ်။စက်ရုံကပြန်မှဟင်းတစ်အိုးလောက်အမြန်ချက်ကြတာဆိုတော့သုံးကြတယ်။အခုတော့အဝယ်မရှိသလောက်ဖြစ်သွားတယ်"လို့အဆောင်လိုင်းခန်းတွေနားမှာဂတ်စ်ဆိုင်ဖွင့်လှစ်ထားသူတစ်ဦးကပြောပါတယ်။
ဂတ်စ်ဈေးနှုန်းဟာစက်တင်ဘာ လအစမှာပြန်လည်ကျဆင်းလာတာဖြစ်ပြီးလက်ရှိမှာတော့ ဂတ်စ်အရည်လုံလောက်အောင်ဝယ်ယူနိုင်တဲ့အခြေအနေရှိနေတယ်လို့ သိရပါတယ်။ ဒီလိုဈေးနှုန်းတွေပြန်လည်ကျဆင်းလာတယ်ဆိုပေမယ့်ကုမ္ပဏီစျးဟာကျပ်နှစ်သိန်းခွဲအထက်ပေါက်ဈေးရှိနေတာကြောင့်ဈေးနှုန်းအမြင့်ပိုင်းမှာပဲဆက်လက်တည်ရှိနေတာဖြစ်ပါတယ်။
"အရောင်းအဝယ်ကတော့ထိန်းနေရတာပါပဲ။ဒီကြားထဲဆိုင်တချို့လည်းပိတ်သွားတယ်။ငှားခအလုပ်သမားခတွေ၊အခွန်အခတွေနဲ့ဒီကာလမှာရေရှည်ရပ်တည်ဖို့ကျအခက်အခဲရှိတယ်လေ။ဈေးလေးတွေလည်းဒီထက်ထပ်ကျလာရင်တော့ပိုအဆင်ပြေမယ်ထင်တယ်"လို့ဂတ်စ်မီးဖိုနဲ့ဆက်စပ်ပစ္စည်းရောင်းချသူတစ်ဦးကပြောပါတယ်။
အိမ်သုံးဂတ်စ်ဈေးကွက်ဟာအာဏာသိမ်းပြီးနောက်ပိုင်းမှာမကြာခဏဈေးတက်တာ၊ အရည်ပြတ်လပ်တာတွေရှိနေပါတယ်။ဒီလိုအခြေအနေတွေကြောင့်လည်းအရောင်းဆိုင်တစ်ချို့ဟာဆက်လက်ရပ်တည်ဖို့ခက်ခဲလာတာပဲဖြစ်ပါတယ်။
