အိမ်သုံးဂက်စ် ဈေးကွက်အတွင်း ယခင်တစ်ပတ်ကြာက ထက် ဈေးနှုန်းတွေပိုမြင့်လာပြီးအချို့နေရာများတွင်ပစ္စည်းပြတ်လပ်မှုကြောင့် အရောင်းအဝယ် ရပ်နားထားရတဲ့ဆိုင်များရှိလာနေကြောင်း အိမ်သုံးဂက်စ်အရောင်းဈေးကွက်ကနေသိရပါတယ်။
" အိမ်မှာသုံးနေတဲ့ဂက်စ်ဘူး သွားဖြည့်တာ ပြီးခဲ့တဲ့တစ်ပတ်ကြာကပဲ တစ်ခါဖြည့်၁၃၀၀ကျပ်ဈေးဖြစ်ခဲ့တာ အခုဒီတစ်ပတ်ဖြည့်တော့ တစ်ခါဖြည့်၁၅၀၀ကျပ်ဖြစ်သွားတယ်။ တစ်ခြားဆိုင်တွေဆို ၁၈၀၀ကျပ်နဲ့၂၀၀၀ကျပ်အထိဖြစ်နေပြီလို့ပြောသေးတယ်။ ဂက်စ်တွေအဝင်နည်းလာလို့ ဝယ်မရဖြစ်နေလို့ ဆိုပြီးပြောတာပဲ"လို့ အိမ်သုံးဂက်စ်သုံးစွဲနေသူအိမ်ရှင်မတစ်ဦးကပြောပါတယ်။
ရန်ကုန်မြို့အတွင်း တစ်ချို့သော အိမ်သုံးဂက်စ်အရောင်းဆိုင်များလည်း ပစ္စည်းပြတ်နေလို့ပိတ်ထားနေရတာတွေရှိလာရာ လက်ရှိမှာ ဂက်စ်တင်သွင်းတဲ့ကုမ္ပဏီတွေကိုယ်တိုင်က ပစ္စည်းအဝင်မရတာကြောင့်လက်လီအရောင်းဆိုင်တွေကိုခွဲတမ်းနဲ့ပြန်လည်ရောင်းချနေရတယ်လို့ဆိုပါတယ်။
မြန်မာနိုင်ငံအနေနဲ့ အိမ်သုံးဂက်စ်ကို ပြည်ပကနေ ရေလမ်း ၊ ကုန်းလမ်းများဖြင့်တင်သွင်းလျှက်ရှိနေရာမှာ နိုင်ငံချင်းထိစပ်နေတဲ့ အိမ်နီးချင်းထိုင်းနိုင်ငံနဲ့တရုတ်တို့ကနေ တင်သွင်းတာဖြစ်ပြီး လက်ရှိ ကာလမှာ ထိုင်းနိုင်ငံ ဘက်က ဂက်စ်အဝင်ပြတ်တောက်နေပြီး တရုတ်နိုင်ငံဘက်က အနည်းငယ်တင်သွင်းရာမှာ လမ်းခရီးအခက်ခဲတွေကြောင့် တင်သွင်းရ ရှိမှုနည်းပါးနေတယ်လို့သိရပါတယ်။
" ဂက်စ်တွေပြတ်တာက ထိုင်းကအဝင်မရှိတော့ဘူး။ မိုးတွင်းလည်းဖြစ်တော့ လမ်းခရီးအခြေအနေအခက်ခဲတွေကြောင့်လည်းပါသလို ဒေါ်လာဈေးအခြေအနေတွေရဲ့ဂယက်လည်းပါတာပေါ့ အခု ဂက်စ်တင်သွင်းတဲ့ကုမ္ပဏီတွေကခွဲတမ်းနဲ့ပေးနေတာက အရင်က ဂတ်စ်အိုးအကြီး၅လုံးလောက်ရတဲ့လက်လီဆိုင်တွေဆိုအခု ခွဲတမ်းအရ၂လုံးလောက်ပဲရတော့တဲ့အခြေအနေဖြစ်နေတာပါ"လို့ မြောက်ဒဂုံမြို့နယ်က လက်လီဂက်စ်အရောင်းဆိုင်ပိုင်ရှင်တစ်ဦးကပြောပါတယ်။
လက်ရှိအိမ်သုံးဂက်စ် ဈေးကွက်အတွင်း ဂက်စ်လိုသလောက်မရရှိနိုင်တာအပြင် ဈေးနှုန်းမှာလည်း တိုးမြှင့်သွားတာကြောင့် အသုံးပြုကြသူတွေအနေနဲ့ ယခင်ထက် ငွေကြေးကုန်ကျမှုများလာကာ လျှပ်စစ်မီးအစားထိုးတဲ့အနေနဲ့ သုံးစွဲရပေမယ့် ဂက်စ်သုံးစွဲမှု မှာ ကုန်ကျစရိတ်သက်သာမှုရှိတယ်လို့မဆိုနိုင်တော့ကြောင်း အသုံးပြုသူအသိုင်းအဝိုင်းမှ သိရှိရပါတယ်။
