မနေ့က မတ်လ (၁၈) ရက်နေ့ကစပြီး တစ်နိုင်ငံလုံးအတိုင်းအတာနဲ့ အလှည့်ကျ မီးပေးစနစ်ကို ပြန်လည် စတင်မယ်လို့ စစ်ကော်မရှင် လက်အောက်ခံလျှပ်စစ်စွမ်းအားဝန်ကြီးဌာနရဲ့ ထုတ်ပြန်ချက်အရ သိရပါတယ်။
ပူပြင်းတဲ့ နွေရာသီရဲ့ အပူရှိန်ကြောင့် လျှပ်စစ်သုံးစွဲမှု မြင့်တက်လာခြင်းနဲ့ ထုတ်လုပ်နိုင်စွမ်း အကန့်အသတ်ရှိခြင်းတို့ကြောင့် အခုလို ဆောင်ရွက်ရခြင်း ဖြစ်တယ်လို့ ဆိုပါတယ်။
နွေရာသီ ဖြစ်တဲ့ မတ်လ မှ ဇွန်လ အထိဟာ ပုံမှန်အားဖြင့် လျှပ်စစ်စွမ်းအားဝန်ကြီးဌာနရဲ့ စုဆောင်းထားတဲ့ ရေတွေ ကို ထိန်းသိမ်းမောင်းနှင်ပြီး ဓါတ်အားဖြန့်ဖြူးရမယ့် ကာလ ဖြစ်ကာ ယခု မတ်လ ဟာ စတင်ထိန်းသိမ်းရမယ့်ကာလ ဖြစ်ပေမယ့် တက္ကသိုလ်ဝင်စာမေးပွဲ မကျင်းပမီနဲ့ကျင်းပချိန် အတွင်း ကျောင်းသား/ကျောင်းသူတွေ ညပိုင်း စာကြည့်ချိန်နဲ့ စာစစ်ဌာနတွေမှာ လျှပ်စစ်မီး မပျက်ဖို့ တိုးမြှင့် ထုတ်လုပ် ဖြန့်ဖြူးပေးခဲ့ရတယ်လို့ ထုတ်ပြန်ချက်မှာဖေါ်ပြထားပါတယ်။
ဒါကြောင့် လက်ရှိ မှာ တက္ကသိုလ်စာမေးပွဲ ပြီးစီး ပြီဖြစ်တဲ့ အတွက် ဇွန်လ အထိ ဓါတ်အား ဖြန့်ဖြူးပေးနိုင်ဖို့ အလှည့်ကျစနစ်နဲ့ ပေးသွားမယ်လို့ သိရပါတယ်။
သို့သော် သဘာ၀ဓါတ်ငွေ့ရည် LNG သုံးဓါတ်အား ပေးစက်ရုံမှ ထုတ်လုပ်တဲ့ လျှပ်စစ် ဓါတ်အား ကို တိုက်ရိုက်လိုင်းဖြင့် ဓါတ်အားပေးသည့် ဓါတ်အားလိုင်းတွေကိုတော့ ဝန်အားမျှတခွဲဝေဖြန့်ဖြူးခြင်း မပြုလုပ်ဘဲ စဉ်ဆက်မပြတ် ဆက်လက်ဖြန့်ဖြူးပေးမယ်လို့စစ်ကော်မရှင်က ထုတ်ပြန်ထားပါတယ်။
