အငှားအိမ်ရာ တိုက်ခန်းတွေကို ငှားရမ်းနေထိုင်ခွင့်ရှိသူ ကိုယ်တိုင် နေထိုင်ခြင်း မရှိဘဲ ထပ်ဆင့် ငှားရမ်းခြင်း ရောင်းချခြင်း တို့ စစ်ဆေးတွေ့ရှိသဖြင့် ၎င်းအိမ်ခန်းငှားရမ်းနေထိုင်ခွင့်ကို ပယ်ဖျက်ပြီး ဥပဒေနဲ့အညီ အရေးယူမှု တွေ ပြုလုပ်ခဲ့တယ်လို့ စစ်ကောင်စီလက်အောက်ခံ အိုးအိမ်ဦးစီးဌာနက ဖေဖော်ဝါရီ ၁၈ ရက်မှာ ထုတ်ပြန်ပါတယ်။
ဒဂုံမြို့သစ် (တောင်ပိုင်း) မြို့နယ်က သုခဒဂုံ အငှားအိမ်ရာတိုက်ခန်းကို ပြန်လည်ရောင်းချသူနဲ့ ပူးပေါင်းပါဝင်သူ ၃ ယောက်ကို တရားစွဲဆိုပြီး အလုပ်နဲ့ ထောင်ဒဏ် ၁ နှစ်စီချကာ အရေးယူခဲ့တယ်လို့ ထုတ်ပြန်ထားပါတယ်။
နိုင်ငံပိုင်အခန်းတွေကို ခွင့်ပြုချက်မရှိပဲ ဥပဒေမဲ့ ရောင်းစားတဲ့အတွက် ပြည်သူပိုင်ပစ္စည်း ကာကွယ်ရေးဥပဒေ ပုဒ်မ ၆(၁) နဲ့ တရားစွဲအရေးယူခဲ့ခြင်းဖြစ်ကာ ရောင်းချခဲ့တဲ့သူတွေကို တရားရုံးက အလုပ်နဲ့ ထောင်ဒဏ် ၁ နှစ်စီ ချခဲ့တဲ့အပြင် အိမ်ခန်းငှားရမ်းခွင့်ပါ ပယ်ဖျက်ပြီး အခန်းကို ပြန်လည်သိမ်းယူခဲ့တယ်လို့ အိုးအိမ်ဦးစီးဌာနရဲ့ ထုတ်ပြန်ချက်မှာ ဖော်ပြထားပါတယ်။
၎င်း သုခဒဂုံ ပြည်သူ့အငှားအိမ်ရာကို နေရေးအခက်အခဲရှိတဲ့ ပြည်သူ၊ အငြိမ်းစားဝန်ထမ်းနဲ့ တာဝန်ထမ်းဆောင်ဆဲ ဝန်ထမ်းတွေ အတွက် ၅ နှစ် ငှားရမ်းနေထိုင်ခွင့်ပေးတဲ့ အငှားအိမ်ရာ ဖြစ်တယ်လို့ အိုးအိမ်ဦးစီးဌာနက ဆိုပါတယ်။
ဒါကို တချို့ ဌားရမ်းနေထိုင်ခွင့် ရရှိသူ တွေက ကိုယ်တိုင်မနေဘဲ ထပ်ဆင့်ငှားရမ်းတာ၊ ငှားရမ်းခွင့်စာရင်းမှာ မပါတဲ့သူတွေကို နေထိုင်စေတဲ့ အပြင် မိမိမပိုင်တဲ့ အခန်းနဲ့ စျေးဆိုင်ခန်းတွေကိုပါ လက်ညှိုးထိုး ရောင်းစားတာတွေ ရှိနေတယ်လို့ အဲဒီဌာနက ထုတ်ပြန်ထားပါတယ်။
"အဲ့ တိုက်ခန်းတွေမှာက တကယ်အိမ် မရှိဘဲ နေစရာ ခက်ခဲ တဲ့ ဝန်ထမ်း မရကျဘဲ အကပ်သင့်ရာ သူတွေ ဘဲရကျတာများတယ် အဲ့ လူတွေကလည်း ဒီမှာနေကျတာ မဟုတ်ဘူး ပြန်ငှားစားကျတာ သူတို့အရေးယူထားတယ်ပြောတဲ့ ၃ယောက် မကဘူး မဲပေါက်တဲ့ သူတွေ တကယ်နေမနေကိုသေချာစိစစ်လိုက်ရင် အများကြီး ထွက်လာမှာ"လို့ အမည်မဖေါ်လိုသူအစိုးရဝန်ထမ်းတစ်ဦးကပြောပါတယ်။
ပြည်သူ့အငှားအိမ်ရာအတွင်း တရားဝင်နေထိုင်ခွင့်ရသူကလွဲပြီး ထပ်ဆင့်ငှားရမ်းတာ၊ အိမ်ငှားစာချုပ်မှာ မပါဝင်သူတွေကို နေထိုင်စေတာ၊ အရောင်းအဝယ်လုပ်တာတွေ ရှောင်ကြဉ်ဖို့နဲ့ စစ်ဆေးပေါ်ပေါက်ရင် အခန်းငှားရမ်းနေထိုင်ခွင့်ကို ပယ်ဖျက်မဲ့အပြင် ဥပဒေနဲ့အညီ အရေးယူခံရမယ်လို့လည်း အိုးအိမ်ဦးစီးဌာနက သတိပေးထားပါတယ်။
