ရန်ကုန်အပြည်ပြည်ဆိုင်ရာလေဆိပ်ကို ညပိုင်းအချိန်တွေမှာ ၂လ ကြာ ပိတ်ထားမှာဖြစ်ကြောင်း လေယာဉ်လက်မှတ်အရောင်းဌာနတွေကနေ အသိပေးကြေညာလာပါတယ်။
လေဆိပ်ရဲ့ပြေးလမ်းပြုပြင်နေတာကြောင့် ညပိုင်းအချိန် ည၁၂နာရီကနေ မနက်၆နာရီအထိကို အောက်တိုဘာ၂၉ရက်ကနေ ဒီဇင်ဘာ၃၁ရက်အထိ ပိတ်ထားမှာဖြစ်တယ်လို့ဆိုပါတယ်။
" လေယာဉ်လက်မှတ်ဝယ်ထားတာညပိုင်းဖြစ်နေတာကို ခရီးစဉ်ပြန်ပြောင်းလိုက်ပြီလို့ email ပို့ထားတယ်။ဒါပေမယ့်သူတို့ပြောင်းတဲ့အချိန်က ကိုယ့်အတွက်အဆင်မပြေဘူးဖြစ်နေတယ်။လေယာဉ်နဲ့ပတ်သက်တဲ့ group တွေထဲသိသူအချို့ကတော့ လက်မှတ်အရောင်းအေးဂျင့်တွေနဲ့ပြန်ဆက်သွယ်တဲ့ဖုန်းကိုဆက်ပြီးပြောင်းဖို့ ပြောထားတာလည်းတွေ့နေရတယ်။လေယာဉ်ပြေးလမ်းပြင်လို့ပိတ်တယ်ဆိုပေမယ့် ရုတ်တရက်ကြီးတော့ကိုယ်ကအလုပ်ရှုပ်သွားတာပေါ့"လို့ လာမယ့်ဒီဇင်ဘာလထဲ ပြည်ပခရီးစဉ်သွားရောက်မယ့်သူတစ်ဦးကပြောထားပါတယ်။
လတ်တလောမှာတော့ လေဆိပ်ပိတ်ဖို့မကြေညာခင်က ပိတ်ချိန်နဲ့ကြုံကြိုက်ခဲ့တဲ့ လေယာဉ်ခရီးစဉ်အချို့ကို MAI ရဲ့ လေယာဉ်လက်မှတ်အရောင်းဌာနက အချိန်ပြောင်းလဲပြင်ဆင်ကြောင်း အသိပေးတာတွေလည်းရှိနေပါတယ်။
ရန်ကုန်လေဆိပ်ကို ၂လကြာပိတ်လိုက်တာနဲ့ပတ်သက်ပြီး စစ်ကောင်စီရဲ့ ရွေးကောက်ပွဲဟာ ဒီဇင်ဘာလမှာကျင်းပသွားမှာ ဖြစ်လို့ လေဆိပ်ကိုပြင်ဆင်ရန်အကြောင်းပြကာ ပိတ်ထားတာဖြစ်နိုင်ကြောင်းလည်းသုံးသပ်သူအချို့ရှိနေပါတယ်။
" ရွေးကောက်ပွဲကြောင့် စစ်ကောင်စီက ပြည်ပကနေလျို့ဝှက် ထောက်လှမ်းရေးတွေဘာတွေ ဝင်လာမှာကြောက်နေပုံရတယ်။အဲ့ဒါကြောင့် လေဆိပ်အဝင်အထွက် သေချာစစ်ဖို့အာရုံစိုက်တဲ့အနေနဲ့ ညဘက်အချိန်တွေကိုပိတ်ထားတာဖြစ်မယ်"လို့ လူမှုကွန်ယက် မှာ ရေးသားသူအချို့ကပြောထားပါတယ်။
