ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံဖြိုးရေးဦးစီးဌာန ရဲ့ အခန်းဝယ်ယူခွင့် ပြုတဲ့ အကြောင်း ကြားစာ ကို အတုအပ ပြုလုပ်ပြီး ငွေကြေး လိမ်လည်တာတွေ ပြုလုပ်နေတယ်လို့ စစ်ကော်မရှင် ရဲ့ မြို့ပြနှင့်အိမ်ရာဖွံဖြိုးရေးဦးစီးဌာန သတိပေးထုတ်ပြန်ချက်အရသိရပါတယ်။

 

မြို့ပြနှင့်အိမ်ရာဖွံဖြိုးရေးဦးစီးဌာန ထံ မှ တိုက်ခန်းဝယ်ယူလိုသူတွေ ထံ ကို ဆက်သွယ်ပြီး အခန်းဝယ်ယူခွင့် ပြုကြောင်း အကြောင်းကြားစာကို အတုအပ ပြုလုပ်၍လည်းကောင်း email account အတု ဖွင့်၍ လည်းကောင်း လိမ်လည် ပြီး တိုက်ခန်းရောင်းချကာ ငွေ လွှဲခိုင်းတာတွေ ပြုလုပ်နေတယ်လို သိရပါတယ်။

 

အခုလိုဌာနဆိုင်ရာ ရဲ့ စာရွက်စာတမ်း အတု တွေ ပြုလုပ်ပြီး လိမ်လည်တာတွေကြောင့် နစ်နာဆုံးရှုံးရသူတွေ လည်း များစွာ ရှိနေတယ်လို့ သိရပါတယ်။

 

"တန်ဖိုးနည်းအိမ်ရာ၊ တန်ဖိုးသင့်အိမ်ရာတွေ ဝယ်ဖို့ လျှောက်ထားရတာက လူများတော့ ဝယ်ခွင့်ကိုယ့်အလှည့်ရဖို စောင့်ရတာအတော်လေးကြာတယ် ဒါကို အခွင့်ကောင်းယူပြီး လိမ်ကြတာ အိမ်ရာလျှောက်ထားသူတွေရဲ့အချက်အလက်တွေသိပြီး ဌာနဆိုင်ရာရဲ့စာရွက်စာတမ်းအတု တွေသုံးပြီး လိမ်တာ ဆိုတော့ ကျားဖြန့်လိမ်နည်းတွေ လို့ထင်တယ် တချိုကျတော့လည်း ပိုင်ရှင်မဟုတ်ဘဲ ပွဲစားတွေနဲ့ ပေါင်းပြီး စာရွက်စာတမ်းအတုလုပ် အရစ်ကျတွေရောင်းပြီး လိမ်ခံရတာတွေလည်း ရှိတယ် ဒါကြောင့် တိုက်ခန်း ဝယ်မယ်ဆိုရင် အိုးအိမ်မှာ စာရွက်စာတမ်းအတုအစစ်သေချာစစ်ပြီးမှဝယ်သင့်တယ်""လို့အိမ်ခြံမြေအကျိုးဆောင်လုပ်သူတစ်ဦးကပြောပါတယ်။

 

ရန်ကုန်လိုမြို့ကြီးတွေမှာ အိမ်လခ ဈေးနှုန်းကြီးမြင့်မှုကြောင့် တိုက်ခန်းဝယ်ယူလိုသူများစွာရှိနေပြီး အိုးအိမ်က တည်ဆောက်တဲ့ တန်ဖိုးနည်း၊ တန်ဖိုးလတ်၊ တန်ဖိုးသင့် အိမ်ရာတွေကို ဝယ်ယူလိုသူများစွာရှိနေပြီး ယင်းတို့ကို ဦးတည်ပစ်မှတ်ထားတာ လိမ်လည်လာတာဖြစ်တယ်လို့ သိရပါတယ်။

 

အခုလို လိမ်လည်ငွေကြေးတောင်းခံရာမှာ သက်ဆိုင်ရာ အိမ်ရာဖွံ့ဖြိုးရေးဌာနခွဲ တာဝန်ရှိသူရဲ့ လက်မှတ် နဲ့တကွ တိုက်ခန်းတန်ဖိုးရဲ့ ၃၀ ရာခိုင်နှုန်းကို လွှဲပို့ရမယ့် ဘဏ်စာရင်းကိုပါ တပါးတည်းထည့်သွင်းဖော်ပြထားပါတယ်။

 

စစ်ကော်မရှင်ရဲ့ ဆောက်လုပ်‌ရေးဝန်ကြီး ဌာန၊ မြို့ပြနှင့်အိမ်ရာဖွံဖြိုးရေးမှုဦးစီးဌာနကလည်း အခုလို လိမ်ခံရတာတွေမရှိအောင် သိရှိလိုတာတွေ ကို ဌာနသို လူကိုယ်တိုင် လာရောက်ဆက်သွယ်မေးမြန်းနိုင်တယ်လို့ ထုတ်ပြန်ထားပါတယ်။