ရန်ကုန်တိုင်းဒေသကြီး၊ ကြည့်မြင်တိုင်မြို့နယ်၊ ဈေးကလေးရပ်ကွက်၊ ရန်ကုန်မြစ်အတွင်း၊ ဗားကရားဆိပ်ကမ်းမှ ရေမိုင်(၅)ဖာလုံခန့်အကွာ မှာ ကျောင်းသား၊ကျောင်းသူတွေအပါအဝင် ခရီးသည် အချို့ လိုက်ပါလာတဲ့ သမ္ဗာန်တစ် စီးတိမ်းမှောက်မှုဖြစ်ပွားကာ ပျောက်ဆုံးသူများလဲရှိနေတယ်လို့ မြန်မာနိုင်ငံမီးသတ်တပ်ဖွဲ့နဲ့ဒေသခံများထံ က သိရပါတယ်။
ဇူလိုင်လ ၁၀ရက် မနက် ၈နာရီ ၁၀မိနစ် ခန့်က. ဖြစ်ပွားခဲ့ကာ လက်ရှိတွင် ရေယာဉ်ပေါ်ပါရှိသူ (၁၇)ဦးအနက် (၈)ဦး ကို ကယ်ဆယ်နိုင်ခဲ့ကာ ပျောက်ဆုံးသူ ၉ဦး ကျန်ရှိသေးတယ်လို့ သိရပါတယ်။
""မောင်းလာတဲ့ စက်လှေက ဒိုက်ငြိလို့ ဖြုတ်နေတဲ့ အချိန် ရပ်ထားတဲ့သင်္ဘောကို ဝင်တိုက်တာ လှေပေါ်မှာက တစ်ဖက်ကျောင်းသား တွေ ပါလာတာ များတယ် အခု ရှာမတွေ့သေးတဲ့ထဲမှာလဲ ကျောင်းသား /သူ တွေပါတယ်ကယ်ဆယ်ရေးအဖွဲ့တွေကတော့ ဆက်ပြီးရှာနေကြတယ်""လို့ကြည့်မြင်တိုင်မြို့နယ်မှ ဒေသခံတစ်ဦးကပြောပါတယ်။
လက်ရှိမှာ လှေတိမ်းမှောက်မှုကြောင့် ပျောက်ဆုံးနေသူတွေ ကို အနောက်ပိုင်းခရိုင်မီးသတ်စခန်းမှ 191 ယာဉ်(၁)စီး၊ သူနာတင်ယာဉ်(၁)စီး၊ ကျောက်တံတားမြို့နယ်မီးသတ်စခန်းမှ သူနာတင်ယာဉ်(၁)စီး၊ အလုံမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ကြည့်မြင်တိုင်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး၊ ကမာရွတ်မြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီးတို့ဖြင့် ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိတယ်လို့ သိရပါတယ်။
Photo- ရောင်စင်မဲ့လူမှုကူညီရေးအသင်း
