စစ်ကောင်စီက တရားမဝင်ကုန်သွယ်မှုတိုက်ဖျက်ရေးဆိုတဲ့ခေါင်းစဉ်နဲ့ယိုးဒယားနဲ့တရုတ်ပစ္စည်းတွေကိုဖမ်းဆီးစစ်ဆေးတာတွေလုပ်ဆောင်နေလို့ရောင်းချသူတွေစိုးရိမ်သောကရောက်နေရပါတယ်။
အောက်တိုဘာလ(၂၃)ရက်မှာစစ်တပ်၊ ရဲနဲ့စည်ပင်ပူးပေါင်းအဖွဲ့တွေကမန္တလေး ဈေးချိုအပါအဝင်ကုန်တိုက်တွေ ၊စတိုးဆိုင်တွေနဲ့အရောင်းဆိုင်တွေကိုဝင်ရောက်စစ်ဆေးပြီးကုန်ပစ္စည်းတွေကိုဖမ်းဆီးသိမ်းဆည်းခဲ့တယ်လို့သတင်းဌာနအချို့မှာဖော်ပြခဲ့ပါတယ်။
"စစ်ဆေးရေးလမ်းကြောင်းရှိတယ်ဆိုလို့ပစွည်းတွေသိမ်းထားတာနှစ်ရက်လောက်ရှိပြီ။ပိုင်ရှင်ကသတင်းကြိုရလို့သိမ်းခိုင်းထားတာပါ"လို့ Mini Mark အရောင်းဝန်ထမ်းတစ်ဦးက ပြောပါတယ်။
အောက်တိုဘာလ(၉)ရက်နေ့ကနေပြည်တော်မှာတရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီအစည်းအဝေးကိုလုပ်ဆောင်ခဲ့ပြီးဖမ်းဆီးစစ်ဆေးတာတွေလုပ်ဆောင်ဖို့ညွှန်ကြားချက်ထွက်ပေါ်လာတာပါ။
တရားမဝင်ကုန်သွယ်မှုများကို နယ်စပ်ဒေသနှင့် ကုန်သွယ်မှုလမ်းကြောင်းပေါ်က တားဆီးစစ်ဆေးခြင်းအပြင် ပြည်တွင်းသိုလှောင်ရုံများနှင့် ဈေးကွက်များအထိ ဝင်ရောက်စစ်ဆေးအရေးယူနိုင်ရေး ဆက်လက်ဆောင်ရွက်ရမယ်လို့ ဆိုထားပါတယ်။
"ဆိုင်ကလိုင်စင်ရှိပါတယ်။ပစ္စည်းတွေကတော့အွန်လိုင်းကကော၊ ကုမ္ပဏီကြီးတွေကကောဝယ်ပါတယ်။ဒါတွေကထိုင်းထုတ်တွေပေါ့။အခုပစ္စည်းတွေဆက်ရောင်းရမလား။ဆိုင်ပိတ်ရမလားဝေခွဲမရဘူး။တခုခုဆိုပစ္စည်းတွေသိမ်းသွားရင်ပြန်မရတော့စိတ်ပူတယ်"လို့ဂတ်မီးဖိုနှင့်ဆက်စပ်ပစ္စည်းရောင်းချသူတစ်ဦးကပြောပါတယ်။
လက်ရှိမှာနယ်စပ်ဂိတ်တွေနဲ့ကုန်သွယ်ရေးလမ်းကြောင်းတွေပိတ်နေတာကြောင့်ကုန်ပစ္စည်းရှားပါးပြတ်လပ်မှုဖြစ်မှာကိုလည်းပြည်သူတွေကစိုးရိမ်နေကြပါတယ်။
