ဘိလပ်မြေတစ်အိတ် ကျပ် ၄၀၀၀၀ ကျော်အထိ ဈေးပေါက်နေပြီး ဈေးကွက်အတွင်းမှာ ဝယ်ယူ မရဖြစ်နေလို့ ဆောက်လုပ်ရေးလုပ်ငန်းအချို့ ရပ်နားထားရတယ်လို့ ဆောက်လုပ်ရေး လုပ်ငန်း လုပ်ကိုင်နေသူတွေက ပြောပါတယ်။
"မနေ့ကအထိ တစ်အိတ်ကို ၃၈၀၀၀ ပေးဝယ်နေကြရတုန်း။ ကန်ထရိုက်သမားတွေလည်း ဒီဘိလပ်မြေ ဈေးနဲ့လုံးဝမကိုက်ဘူး။ ပိုင်ရှင်က ပစ္စည်းဝယ်ပေးပြီး လက်ခသမားတွေကတော့ အိမ်ရှင်ဝယ်ပေးရင်လုပ်၊ မဝယ်သေးလို့ ရပ်ထားရင် ပန်းရံသမားတွေလည်း အလုပ်နား နေကြရတာပဲ။ ဒီဘိလပ်မြေဈေးနဲ့က ဘယ်လိုမှမကိုက်လို့ နားထားကြတာကများတယ်" လို့ လက်ခစား လုပ်ကိုင်နေသူ အလုပ်သမားခေါင်းဆောင်တဦးက ပြောပါတယ်။
ဘိလပ်မြေဈေးနှုန်းတွေ မြင့်တက်ပြီး ဝယ်မရဖြစ်နေတာတွေက သင်္ကြန်ကာလ မတိုင်ခင်ကတည်းက ဖြစ်ပြီး ကြိုတင်စုဆောင်းတာမရှိတဲ့ ဆောက်လုပ်ရေးလုပ်ငန်းအချို့ ရပ်နားနေရတယ်လို့ သိရပါတယ်။
မတ်လ ၂၈ ရက်က လှုပ်ခတ်ခဲ့တဲ့ ငလျင်က နိုင်ငံအတွင်း မြို့နယ် ၅၇ မြို့နယ်မှာ သက်ရောက်မှုရှိခဲ့ပြီး လူနေအိမ်ပေါင်း ၆၀၀၀၀ ကျော်နဲ့ ရုံးဌာန၊ ဘာသာသာရေးအဆာက်အဦ တွေ အများအပြား ထိခိုက်ခဲ့တယ်လို့ ထုတ်ပြန်ထားပါတယ်။ ဒါ့အပြင် ဘိလပ်မြေစက်ရုံ ၉ ရုံရှိတဲ့အထဲက ငလျင်ကြောင့် စက်ရုံ ၃ရုံလည်ပတ်နိုင်တာမရှိလို့ ဘိလပ်မြေထုတ်လုပ်မှုလျော့နည်းပြီး ဝယ်လိုအားများနေတာလည်း ဖြစ်ပါတယ်။
"ကျွန်တော်တိုတော့ မနားရဘူး။ အိမ်ရှင်ကဝယ်ပေးတယ်။ မနေ့က ၃၈၀၀၀ နဲ့ ၃အိတ်ပါ လာတယ်။ ဆောက်တာကလည်း ၃ထပ်၊ နားတော့ မနားရဘူး။ အိမ်ရှင်က သူ့ဟာသူကြံဖန်ဝယ်နေတာ။ တစ်ချို့ လုပ်ငန်းခွင်တွေတော့ နားနေကြရတယ်လို့ ကြားရတယ်" လို့ ဆောက်လုပ်ရေး အလုပ်သမား တစ်ဦးက ပြောပါတယ်။
ဘိလပ်မြေတစ်အိတ် ကျပ် ၁၇၀၀၀ နဲ့ ရောင်းချ ရမယ်လို့ စစ်ကောင်စီက ဈေးနှုန်းသတ်မှတ်ထားပြီး ဘိလပ်မြေရောင်းချမှုတွေကို လိုက်လံစစ်ဆေးဖမ်းဆီးမှုတွေ ပြုလုပ် ခဲ့တာ ကြောင့် ဈေးကွက်အတွင်း အကန့်သတ်နဲ့ ရောင်းချနေတာကို တွေ့ရပါတယ်။
