ယခုရက်ပိုင်း စျေးနှုန်းဆက်တိုက်မြင့်တက်လာနေသော ပြည်တွင်းအခေါက်ရွှေစျေးနှုန်းဟာ ဒီနေ့တွင် တစ်ကျပ်သားကို ကျပ် သိန်း ၁၀၀ ဝန်းကျင်အထိ နီးကပ်လာနေကြောင်း သိရပါတယ်။
ကမ္ဘာ့ရွှေစျေးနှုန်းဆက်တိုက်မြင့်တက်လာမှုနဲ့အတူ ပြည်တွင်းရွှေစျေးနှုန်းကလည်း လိုက်ပါမြင့်တက်လာနေခြင်းဖြစ်ကာ စျေးကွက်အတွင်း၌ ရွှေတစ်ကျပ်သားစျေးနှုန်းဟာ ကျပ် ၉၈ သိန်း မှ ၉၉ သိန်း ဝန်းကျင်အထိ ပေါက်စျေးရှိလာနေတာဖြစ်ပါတယ်။
ကမ္ဘာ့ ရွှေစျေးလည်းဆက်တိုက်မြင့်တက်လာနေပြီး တစ်အောင်စကို ၄၆၀၀ ဒေါ်လာ ဝန်းကျင်အထိ စျေးဖြစ်လာနေပြီး စျေးနှုန်းထပ်တက်နေမယ့် အခြေအနေတွေလည်း ရှိနေတယ်လို့ ခန့်မှန်းပြောဆိုနေကြပါတယ်။
ပြီးခဲ့တဲ့ ရက်ပိုင်းတွင် ကမ္ဘာ့ရွှေစျေးနှုန်းဟာ တစ်အောင်စကို အမေရိကန်ဒေါ်လာ ၄၅၈၀ ဝန်းကျင်နေခဲ့ပြီး ပြည်တွင်းအခေါက်ရွှေစျေးဟာ တစ်ကျပ်သားကို ကျပ် ၉၅ သိန်းဝန်းကျင်စျေးရှိနေခဲ့တာပါ။
အမေရိကန် သမ္မတ ဒေါ်နယ်ထရမ့်၏ ဗင်နီဇွဲလားကို ဝင်ရောက်တိုက်ခိုက်မှု၊ အမေရိကန်ဒေါ်လာစျေး တန်ဖိုးကျဆင်းနေမှု၊ ကမ္ဘာ့နိုင်ငံများကြား စစ်ပွဲများ၊ ပဋိပက္ခများ ကျယ်ပြန့်လာမှု အပါအဝင် လှုပ်လှုပ်ခတ်ခတ်ဖြစ်နေသော ကမ္ဘာ့နိုင်ငံရေး နဲ့ စီးပွားရေးအခြေအနေတွေကြောင့် ယခုလို စျေးနှုန်းတွေ မြင့်တက်လာနေတယ်လို့ နိုင်ငံတကာသတင်းဌာနတွေမှာ သုံးသပ်ရေးသားနေကြပါတယ်။
