ပဲခူးမြို့နယ် အတွင်း က မော်တော်ယာဉ်များနဲ့ ဆိုင်ကယ် များ အတွက် စက်သုံးဆီ ထုတ်ယူခွင့် စာအုပ် ပြုလုပ်ပေးဖို့ဆိုကာ ယာဉ်ပိုင်ရှင်များကို မိမိတို့ အပိုင် ရပ်/ကျေးအုပ်ချုပ်ရေးမှုးရုံးများတွင် စာရင်းပေးသွင်းခိုင်းတယ်လို့ ဒေသခံများ ထံမှ သိရပါတယ်။
စက်သုံးဆီ ဝယ်ယူရာမှာ အခက်ခဲ မဖြစ်စေဖို့ ယာဉ်လိုင်စင်ရှိသူတွေ ကို စက်သုံးဆီ ထုတ်ယူခွင့် စာအုပ် ပြုလုပ်ပေးမှာ ဖြစ်တယ်လို့ သိရပါတယ်။
""စက်သုံးဆီ ထုတ်ယူခွင့် စာအုပ် ထုတ်ပေးမယ်လို့ပြောတာဘဲ မတ်လ၂၂ရက် နောက်ဆုံးစာရင်းပေးရမယ်ဆိုလို့ ရွာထဲ က လိုင်စင်ရှိတဲ့ ဆိုင်ကယ်၊ ကား ရှိတဲ့ သူတွေ က အုပ်ချုပ်ရေးမှုးရုံးမှာ သူတို့တောင်းတဲ့အချက်အလက်တွေယူပြီးစာရင်းသွားပေးရတယ် စာအုပ်ကတော့ တစ်ပတ်လောက်နေမှရမယ်ပြောတယ် သေချာတော့မသိဘူး အုပ်ကြီးတွေကိုလည်း မနေ့ကမှ အထက်က စာရင်းကောက်ခိုင်းတယ် ဒီနေ့နောက်ဆုံးဆိုတော့ အသဲသန်လုပ်နေရတာ""လို့ ပဲခူးမြို့နယ် မှဒေသခံတစ်ဦးကပြောပါတယ်။
စက်သုံးဆီ ထုတ်ယူခွင့်စာအုပ် လျှောက်ထားဖို့ အတွက် ယာဉ်လိုင်စင်မိတ္တူ၊ ယာဉ်အမျိုးအစား၊ ယာဉ်ပိုင်ရှင်အမည် (မှတ်ပုံတင်မိတ္တူ)၊သက်ဆိုင်ရာ ရပ်ကွက်/ ကျေးရွာအုပ်စု အုပ်မှူး များ၏ နေထိုင်ကြောင်းနှင့် ပိုင်ရှင်ဖြစ်သည်မှာ မှန်ကန်ကြောင်း ထောက်ခံချက်တို့ လိုအပ်တယ်လို့ သိရပါတယ်။
လက်ရှိ ဖြစ်ပေါ်နေသော စက်သုံးဆီ ရှားပါးမှုအတွက် စစ်ကော်မရှင်မှ မော်တော်ယာဉ်၊ မော်တော်ဆိုင်ကယ် များကို စုံ၊ မ စနစ်ဖြင့် တစ်ရက်စီ ယာဉ်မောင်းနှင်ခွင့် စက်သုံးဆီ ဝယ်ယူခွင့် ပြုထားသလို စက်သုံးဆီ အရောင်းဆိုင်တွေမှာ မော်တော်ယာဉ်နဲ့ ဆိုင်ကယ် များ အကြိမ်ကြိမ် တန်းစီဝယ်ယူမှုများ လျော့နည်းပပျောက်စေရေးအတွက် တစ်ရက်လျှင် ဆီတစ်ကြိမ်သာ ဝယ်ခွင့်ပေးမယ့် တယ်လီဖုန်း Application အသုံးပြုတဲ့ စနစ်ကို မတ်လ ၁၂ရက် စတင် ပြီးနေပြည်တော်၊ ရန်ကုန်၊ မန္တလေးနဲ့ တောင်ကြီးမြို့တွေမှာ စမ်းသပ်အသုံးပြုလျက်ရှိကြောင်း သိရပါတယ်။
