မိုးလေဝသနှင့်ဇလဗေဒညွန်ကြားမှုဦးစီးဌာနရဲ့ ဩဂုတ်၂၀ရက်နေ့ မနက်၆နာရီ ခွဲ အချိန် တိုင်းတာ ထုတ်ပြန်ချက်အရ ပဲခူး မြစ်ရေဟာ လာမယ့် ၂၄နာရီ အတွင်း မှာ ပဲခူးမြို့ရဲ့ စိုးရိမ်ရေမှတ် ကို ရောက်ရှိမယ်လို့ ထုတ်ပြန်ထားပါတယ်။
လက်ရှိမှာ ပဲခူးမြစ်ရေဟာ စိုးရိမ်ရေမှတ်အောက် တစ်ပေခွဲကျော်မှာ ရှိနေပြီ လာမယ့် ၂၄နာရီ အတွင်းမှာ စိုးရိမ်ရေမှတ် ကို ရောက်ရှိလာမှာ ဖြစ်တယ်လို့ဆိုပါတယ်။
"မနေ့ကတည်းက ဇိုင်းတောင်ဘက်မှာရေဝင်နေပြီ အခုမနက်တော့ ရေကငြိမ်နေတယ် ဆက်လည်းမတက်သေးသလို ရေလည်းမကျဘူး အရင်တခါရေကြီးတုန်းက ပစ္စည်းတွေတောင် နေရာပြန်မချနိုင်သေးဘူး အခုထက်ရေကြီးမယ်ဆိုတော့ အောက်ခြေ လူတန်းစားတွေ စားဝတ်နေရေး ပိုပြီး ခက်ခဲလာဖို့ပဲရှိတော့မယ် တချို့ တွေ ဆို ရေမတက်တဲ့ အခြားနေရာ တွေ မှာ အခုမိုးတွင်းကာလကို အိမ်ငှားပြီး သွားနေကြတာတွေရှိတယ် ရေခဏခဏ တက်နေတော့ အလုပ်လည်းလုပ်မရ လူတွေလဲအန္တရယ်ရှိတော့ သွားငှားနေကြတာ""လို့ ပဲခူးမြို့နေသူတစ်ဦးကပြောပါတယ်။
ပြီးခဲ့တဲ့ ဇူလိုင်လနောက်ဆုံးပတ်က စကာဩဂုတ်လ ပထမအပတ်အထိ ပဲခူးမြစ်ရေ စိုးရိမ်ရေမှတ်ထက် ကျော် လွန်ရောက်ရှိခဲ့ တဲ့ အတွက် ရေဘေးကယ်ဆယ်ရေးစခန်း၂၇ ခုဖွင့်လှစ်ထားခဲ့ပြီး ပြည်သူ ၅၀၀၀၀ ခန့် ရေဘေးသင့်ခဲ့ကာ ရေဘေးကြောင့်သေဆုံးသူတွေလည်းရှိခဲ့တာပါ။ ဒါ့အပြင် ၂၀၂၃ အောက်တိုဘာလမှာလည်း စံချိန်တင်ရေကြီးနစ်မြုပ်မှုကြောင့် လယ်စိုက်ဧကပေါင်းများစွာနဲ့ စီးပွားရေးလုပ်ငန်းအများအပြား ပျက်စီးဆုံးရှုံးခဲ့ပါတယ်။
