ဒီအာဏာသိမ်းမှု့မတိုင်ခင်နဲ့ဖမ်းဆီးမခံရခင်အထိတော့ကိုချမ်းငြိမ်းသူဟာရန်ကုန်မြို့ဆင်ခြေဖုံးမြို့နယ်လေးတခုမှာနေထိုင်ပြီးမိခင်နဲ့ညီမငယ်လေးကို အစားအသောက်အော်ဒါလေးတွေ စက်ဘီးနင်းပြီးပို့ဆောင်ရင်း ရှာဖွေကျွေးမွေးနေခဲ့တဲ့သူပါ။
အာဏာသိမ်းပြီးနောက်ပိုင်းသူရတဲ့အော်ဒါလေးတွေထဲကစားဝတ်နေရေးမ ပြေလည်တော့တဲ့ CDM ဝန်ထမ်းတွေကိုမျှပေးခဲ့တဲ့သူတယောက်ပါ။
"ကျတော်ရတဲ့အော်ဒါလေးတွေထဲကအဆင်မပြေလို့ဝင်လုပ်နေတဲ့CDMဝန်ထမ်းတွေကိုခွဲပေးတယ်။သူတို့အဆင်ပြေအောင်လို့"လို့ သူကပြောပါတယ်။
ဒီလိုကူညီပေးရတာကိုပဲကိုချမ်းငြိမ်းသူတယောက်အာဏာသိမ်းစစ်အုပ်စုကိုတော်လှန်တဲ့နေရာမှာတထောင့်တနေရာမှာပါဝင်ခဲ့ရတယ်လို့မှတ်ပြီးပျော်နေခဲ့တာပါ။
မိခင်ကြီးနဲ့ညီမငယ်လေးရဲ့စားဝတ်နေရေးတာဝန်ကိုထမ်းပိုးထားတဲ့ကို ချမ်းငြိမ်းသူဟာသူများတွေလိုအပြည့်အဝစစ်အာဏာသိမ်းဆန့်ကျင်မှု့မှာမပါဝင်နိုင်သေးပေမယ့်သူရရာနည်းလမ်းလေးနဲ့ကူညီပေးနေသူပါ။
ဒီလိုစေတနာကောင်းတဲ့သူ့အတွက်ကံမကောင်းမှု့တခုကဆိုက်ဆိုက်မြိုက်ရောက်လာပါတော့တယ်။
"အဲ့ဒီ့နေကရုံးအော်ဒါစောင့်နေရင်းဖုန်းတလုံးဝင်လာတယ်ဗိုက်တအားဆာလို့တဲ့ပီဇာလှမ်းမှာတာ၊ ဘယ်အရသာစားလို့အဆင်ပြေလဲမေးလို့ကျွန်တော်တောင်သရက်အသီးအနံ့အရသာလေး Pizza Maru Myanmar ကဝယ်ပြီးသွားပို့တာ"လို့သူကပြောပါတယ်။
သူ့ကိုမှာတဲ့ Customer ကဗိုက်တအားဆာတယ်လို့ပြောတာကြောင့်စောင့်လက်စအော်ဒါလေးကိုခဏဖယ်ပြီးအမေ့ကိုအပ်မယ့်ပိုက်ဆံလေးနဲ့ကိုချမ်းမြေ့သူတယောက်စက်ဘီးလေးနင်းပြီးအပြေးအလွှားသွားပို့ခဲ့တာပါ။
"ပို့ရမယ့်နေရာရောက်တော့သုံးလွှာပေါ့နော်။ကျွန်တော်ကလဲဘယ်ညာတံခါးမမေးမိတော့အားနာတာနဲ့ရပ်စောင့်ရင်းဖုန်းဆက်တော့ ငါးမိနစ် လောက်စောင့်ပေးပါ လို့ပြောတော့စောင့်နေရတာ"လို့ ကိုချမ်းငြိမ်းသူကဆက်ပြောပါတယ်။
ဓာတ်ပုံ - အဖမ်းမခံရမီ လှေကားရှေ့တွင် ဓာတ်ပုံရိုက်ခဲ့စဉ်
ဒါပေမယ့်ကိုချမ်းငြိမ်းမျှော်လင့်သလို Customer ကတံခါးဖွင့်ပြီးအပြုံးချိုချိုနဲ့ညီလေးမောနေပြီလားလို့မေးခဲ့တာမျိုးဖြစ်မလာခဲ့ပါဘူး။
"မကြာဘူးရဲနဲ့စစ်သားတွေသေနတ်နဲ့ချိန်ပြီးတက်လာတယ်ကျွန်တော်ကလဲပီဇာထုတ်လေးကိုင်ပြီးဘေးကပ်ပေးတာ ပေါ့၊ ကိုယ့်လာဖမ်းတယ်လဲမထင်ဘူးလေ။ကျွန်တော့်ရှေ့လဲရောက်ရောသေနတ်နဲ့အကြာကြီးချိန်ပြီးမင်းကိုဖမ်းဝရမ်းထုတ်ထားလို့ဖမ်းတာဆိုပြီးဖမ်းသွားတာ"လို့ သူကြုံခဲ့ရတဲ့အဖြစ်ကိုဆက်ပြောပါတယ်။
ဒီလိုနဲ့ကိုချမ်းငြိမ်းသူတယောက်သူ့ကိုအော်ဒါမှာယူတဲ့စမ်းချောင်းအောင်မြင့်မိုရ်လမ်းတိုက်တခုကနေစမ်းချောင်းရဲစခန်းအမှတ်၂၄ ကိုရောက်ရှိသွားပါတယ်။
အဲ့ဒီမှာသူ့ကိုဘယ်သူတွေနဲ့အဆက်အစပ်ရှိလဲမေးမြန်းပြီးရိုက်နှက်ပါတော့တယ်။
ဒါပေမယ့်ကိုချမ်းငြိမ်းသူပါးစပ်ကကယ်ပါယူပါလို့အော်ရမယ့်အစားအမေနဲ့ညီမလေးအတွက်ချန်ပြီး ပီဇာဝယ်ခဲ့တဲ့ငွေလေးသုံးသောင်းကိုသာတွင်တွင်တောင်းနေမိတယ်လို့ဆိုပါတယ်။
"အိမ်ကိုလုံးဝမဆက်သွယ်ခိုင်းဘူး။ကျွန်တော်ကအမေ့ကိုပေးမယ့်ပီဇာဖိုးလေးသုံးသောင်းပြန်ပေးပါလို့ပဲတောင်းတယ်။အဲ့ဒါကိုဒီ့ကောင့်ကိုမနက်ဖြန်ထောင်ပို့ရမယ်ဆိုပြီးပဲပြောတယ်"လို့ စမ်းချောင်းစခန်းတွင်းကြုံခဲ့ရတဲ့အခြေအနေကို ကိုချမ်းငြိမ်းသူက MLN ကိုဆက်ပြောပါတယ်။
သူ့ကိုစဖမ်းဆီးခဲ့တာမေလ ၃၀ ရက်နေ့ဖြစ်ပြီး ၃၁ ရက်နေ့မှာတော့သူ့ကို၅၀၅-ကနဲ့အင်းစိန်ထောင်ကြီးကိုပို့ဆောင်လိုက်ပါတော့တယ်။
ဒါပေမယ့်သူတော်ကောင်းကိုနတ်မတယ်လို့ပဲဆိုဆိုမိခင်ကြီးကိုလုပ်ကြွေးခဲ့တဲ့ကုသိုလ်ကြောင့်ပဲပြောပြော ကိုချမ်းငြိမ်းသူတယောက်စမ်းချောင်းအချုပ်ထဲမှာလွတ်မယ့်သူတယောက်ကနေတဆင့်မိခင်ကြီးဆီကိုသူအချုပ်ထဲရောက်နေကြောင်းဆက်သွယ်နိုင်ခဲ့ပါတယ်။
"အမေတို့ကိုအဆက်အသွယ်ရတယ်။ပန်ဒါကအကိုတွေအမတွေရောအဲ့ဒါကိုလာထုတ်တာမရဘူး။အဲ့ဒါနဲ့အင်းစိန်ကိုရောက်တာပေါ့"လို့သူကဆက်ပြောပါတယ်။
အင်းစိန်ထောင်ထဲရောက်ရောက်ချင်းမှာပဲသူတို့လိုနိုင်ငံရေးပုဒ်မတွေနဲ့ရောက်လာတဲ့သူတွေကိုထောင်အာဏာပိုင်တွေကပြင်းပြင်းထန်ထန်နှိပ်ကွပ်နေတာနဲ့ကြုံရပါတော့တယ်။
"တော်တော်ဆိုးပါတယ်၊ နောက်ပိုင်းအဆက်တခုရလို့တော်တော်သက်သာသွားတာကျွန်တော်တို့ကိုဆိုသူတို့ကပိုနှိပ်ကွပ်တာဒီအကြောင်းတွေပြန်တောင်မပြောပြချင်လောက်အောင်ပါပဲ"လို့ သူအင်းစိန်ထောင်မှာဖြတ်သန်းခဲ့ရတဲ့အခြေအနေကိုဆက်ပြောပါတယ်။
ကိုချမ်းငြိမ်းသူဟာဒီလိုနဲ့ထောင်ထဲမှာ ၄ လနဲ့၂၁ရက်တိတိစစ်အာဏာရှင်ပေးတဲ့ ဒုက္ခပေါင်းမြောက်များစွာနဲ့နေထိုင်ခဲ့ရပါတယ်။
သူလွတ်မယ့်ရက်မှာတောင်အတော်ဒုက္ခရောက်ခဲ့တာမျိုးကြုံခဲ့ရတယ်လို့လဲသူကအခုလိုဆက်ပြောပါတယ်။
"လွှတ်မယ့်နေ့ကမလွှတ်ဖူး၊ ရစ်နေတာနာမည်စာရင်းကပါပြီးသား၊ အဲ့ဒါကိုအမေစောင့်နေလို့ပါဗျာ လို့ပြောတော့ မင်းငါတို့အားလုံးကိုကန်တော့ရင်လွှတ်ပေးမယ်ပြောနေလို့ အကုန်လုံးကိုပတ်ကန်တော့ခဲ့ရသေးတယ်"
စစ်ကောင်စီတပ်တွေကအာဏာရှင်ဆန့်ကျင်ရေးတက်ကြွလှုပ်ရှားသူတွေအပါအဝင်တက်ကြွလှုပ်ရှားသူတွေကိုကူညီပေးတဲ့လူငယ်တွေအပါအဝင်အသက်အရွယ်မရွေးလက်ထောက်ချပြီးဖမ်းဆီးတာတွေအွန်လိုင်းကနေတဆင့်ချိတ်ဆက်ပြီးဖျားယောင်းခေါ်ဆောင်ဖမ်းဆီးတာတွေကြိမ်ဖန်များစွာပြုလုပ်ခဲ့ပါတယ်။
အဲ့ဒီ့လိုဖမ်းဆီးမှု့တွေကြောင့်တက်ကြွလှုပ်ရှားသူလူငယ်တွေတော်တော်များများဖမ်းဆီးခံခဲ့ရပါတယ်။
အဲ့ဒီ့ထဲကမှကိုချမ်းငြိမ်းသူလိုအစားအသောက်ပို့ဆောင်သူတယောက်ရဲ့ဖမ်းဆီးခံခဲ့ရပုံကို Myanmar Labour News က Life Story တခုအနေနဲ့ဆက်သွယ်မေးမြန်းဖော်ပြပေးလိုက်ရခြင်းဖြစ်ပါတယ်။
(နေရပ်လိပ်စာအပါအဝင်တချို့သောအချက်အလက်များကိုကာယကံရှင်ရဲ့တောင်းဆိုမှု့ကြောင့် Myanmar Labour News မှချန်လှပ်ဖော်ပြထားပါသည်)
