စက်သုံးဆီ အရောင်းဆိုင်တွေမှာ မော်တော်ယာဉ်နဲ့ ဆိုင်ကယ် များ အကြိမ်ကြိမ် တန်းစီဝယ်ယူမှုများ လျော့နည်းပပျောက်စေရေးအတွက် တယ်လီဖုန်း Application အသုံးပြုတဲ့ စိစစ်ရောင်းချမှုစနစ်ကို ပြုလုပ်ကာ တစ်ရက်ကို တစ်ကြိမ်သာ ဝယ်ခွင့် ပြုမယ်လို့ စစ်ကော်မရှင်က မတ်လ ၁၁ရက်မှာ အသိပေးကြေညာ ပါတယ်။
၎င်းစနစ်ကို မတ်လ ၁၂ရက် စတင် ပြီးနေပြည်တော်၊ ရန်ကုန်၊ မန္တလေးနဲ့ တောင်ကြီးမြို့တွေမှာ စမ်းသပ်အသုံးပြုသွားမှာဖြစ်ကာ စနစ်ကို လိုအပ်သလို ပြင်ဆင်စစ်ဆေးပြီးနောက် အခြားမြို့ကြီးတွေမှာလည်း ဆက်လက်အသုံးပြုသွားမှာဖြစ်ကြောင်း သိရပါတယ်။
၎င်းစနစ် သုံးစွဲရန် အတွက် ယာဉ်ပိုင်ရှင်များအနေဖြင့် Application ဒေါင်းလုပ်လုပ်ခြင်း သို့မဟုတ် Registration ပြုလုပ်ခြင်း မလိုအပ်ဘဲ စက်သုံးဆီအရောင်းဆိုင်များမှသာ စိစစ်ဆောင်ရွက်ပေးသွားမှာဖြစ်တယ်လို့ ဆိုပါတယ်။
မော်တော်ယာဉ်များအတွက် Wheel Tax မှာပါရှိတဲ့ Barcode ကို ဆိုင်ဝန်ထမ်းများက Scan ဖတ်ကာ စနစ်မှ အလိုအလျောက်စစ်ဆေးပြီး ယာဉ်တစ်စီးဟာ တစ်ရက်အတွင်း စက်သုံးဆီတစ်ကြိမ်သာ ဝယ်ယူနိုင်မယ်လို့ သိရပါတယ်။ အကယ်၍ တစ်ရက်အတွင်း ထပ်မံဝယ်ယူရန် Scan ဖတ်ပါက ယခင်ဝယ်ယူထားမှုကို စနစ်က ဖော်ပြပေးမှာဖြစ်ပြီး အဲဒီနေ့အတွက် ဆီဝယ်ယူခွင့် မရရှိတော့ဘဲ နောက်တစ်ရက်မှသာ ထပ်မံဝယ်ယူနိုင်မှာဖြစ်ပါတယ်။
ဒါ့အပြင် အရောင်းဆိုင်တွေမှ စက်သုံးဆီ စိစစ်ရောင်းချရာတွင် လက်ရှိထုတ်ပြန် ထားတဲ့ စုံ မ အလိုက် ယာဉ် ထွက်ရမယ့် စနစ် ကိုပါ စစ်ဆေးရမှာ ဖြစ်ပြီး မိမိယာဉ် အသုံးပြုခွင့် ရှိတဲ့ ရက် အတွက်သာ စက်သုံးဆီ ဝယ်ယူခွင့်ရရှိမှာ ဖြစ်တယ်လို့ သိရပါတယ်။
