ကုန်ဈေးနှုန်းမြင့်တက်မှုဟာ နေ့စဉ်ဆိုသလိုပိုမိုဆိုးရွားလာပြီး ထောင်ဝင်စာပေးပို့နိုင်ဖို့အတွက်ပိုမိုခက်ခဲလာတယ်လို့အကျဉ်းသားရှိတဲ့ မိသားစုဝင်တွေကပြောပါတယ်။
စစ်ကောင်စီလက်ထက်မှာမတရားသဖြင့်ဖမ်းဆီးခံရတာတွေများပြားနေပြီးပြစ်ဒဏ်တွေကိုအဆမတန်ချမှတ်နေတာပဲဖြစ်ပါတယ်။
ဒီအခြေအနေမှာကုန်ဈေးနှုန်းမြင့်တက်လာတာမှုဟာဆိုးရွားလာတာကြောင့်ထောင်ဝင်စာပေးပို့နိုင်ဖို့ပိုမိုခက်ခဲလာတာပဲဖြစ်ပါတယ်။
"အာဏာသိမ်းပြီးကတည်းကဈေးတွေကတောက်လျှောက်တက်လာတာပါပဲ။အခုကတော့ပိုဆိုးလာတာပေါ့။ထောင်ဝင်စာတစ်ခါပို့ဖို့ တစ်သိန်းကျော်ဆိုတာဘာမှမပါဘူး။အပြင်မှာကျတော့လည်းငွေရှာရခက်နေတယ်။အထဲကလူတွေကလည်းကိုယ်တွေမပို့ရင်အနေအစားခက်တယ်။အခုတောင်ထောင်ဝင်စာပို့တာအရင်ထက်လူနည်းလာတယ်။ပစ္စည်းအရေအတွက်တွေနည်းလာတယ်"လို့ထောင်ဝင်စာလစဉ်ပေးပို့နေသူတစ်ဦးကပြောပါတယ်။
ထောင်ဝင်စာပေးပို့ရာမှာအများစုဟာဈေးသက်သာတဲ့စားသောက်ကုန်တွေကိုအဓိကထားပေးပို့နေတာဖြစ်ပေမယ့်လက်ရှိမှာတော့ဈေးသင့်တဲ့စားသောက်ကုန်တွေဟာလည်းပစ္စည်းပြတ်လပ်တာ၊ဝယ်လိုအားများတာ တွေကြောင့်ဝယ်ယူဖို့ခက်ခဲလာတယ်လို့သိရပါတယ်။
"အခုကလူတိုင်းကဈေးသက်သာလေးရှာဝယ်နေကြတယ်။နောက်ကုန်တွေကလည်းပေါပေါများများမရှိတော့စိတ်ညစ်ရတယ်။အင်္ဂလိပ်ဆေးဈေးကြီးလို့မြန်မာဆေးဝယ်ဖို့လုပ်လည်း ဈေးကတက်တာပဲ။ကော်ဖီတွေဆိုလည်းဈေးတက်တယ်။အရင်ကမုန့်၆မျိုးလောက်ပါရင်အခုကတော့၄မျိုးလောက်ပဲပါနယ်။ငွေကတော့အရင်ကထက်ပိုကုန်တယ်။အထဲကလူလည်းအဆင်မပြေဘူး။အပြင်မှာရှာရတာလည်းပိုခက်လာတယ်"လို့ ရန်ကုန်မြို့ကအကျဉ်းသားမိသားစုဝင်တစ်ဦးကပြောပါတယ်။
စစ်ကောင်စီလက်ထက်မှာမတရားသဖြင့်ဖမ်းဆီးတာတွေလုပ်ဆောင်နေသလိုတရားစီရင်ရေးနဲ့အုပ်ချုပ်ရေးပိုင်းကလည်းနစ်နာသူေတွကိုခေါင်းစဉ်အမျိုးအမျိုးနဲ့အကြပ်ကိုင်ငွေညှစ်တာတွေလည်းလုပ်ဆောင်နေပါတယ်။
ဒါ့အပြင် ပြစ်မှုပြစ်ဒဏ်တွေကို အဆမတန်ချမှတ်နေတာကြောင့်လည်း အကျဉ်းသားတွေတင်မဟုတ်ဘဲ မိသားစုဝင်တွေပါ ပိုမိုခက်ခဲလာကြတာ ဖြစ်ပါတယ်။
အခြေခံလူတန်းစားတွေဟာ ထောင်ဝင်စာပေးပို့နိုင်ဖို့ အတိုးနဲ့ချေးငွေရယူတာတွေ၊ ဆံပင်ညှပ်ရောင်းချတာတွေနဲ့ ပိုင်ဆိုင်မှုတွေကို ရောင်းချတာတွေပါ လုပ်နေကြရတာပဲ ဖြစ်ပါတယ်။
Photo_ထောင်၀င်စာပို့ကြမယ် FB
