ရန်ကုန်တိုင်းဒေသကြီး၊ အင်းစိန်မြို့နယ်၊ မြတောင်ဝန်ကြီးဦးမှိုလမ်း၊ စက်မှုဇုန် (၃)ရှိ Golden Colour Fashion (Myanmar) စက်ရုံ အလုပ်ရှင်ဟာ အလုပ်သမားတွေကိုလုပ်အားခတိုးပေးမယ်လို့ ကြိုတင်အသိပေးထားပြီး အမှန်တကယ် လစာထုတ်ချိန်မှာ မပေးခဲ့ဘူးလို့ သိရပါတယ်။
" ကျွန်တော်သိရသလောက်တော့ စက်တင်ဘာကျရင်လုပ်ခတိုးပေးမယ် အားလုံးထောက်ပံ့ကြေးပါအပါတစ်နေ့ ၁၁၀၀၀ တိုးပေးမယ်လို့ပြောထားတာ။ ခုလစာထုတ်တော့မပေးနိုင်ဘူးဆိုလို့ အလုပ်သမားတွေစက်ရုံထဲမှာ တေင်းဆိုနေတယ်လို့ကြားရတယ်။ မက်လုံးပေးခိုင်းလာတာ။ ပြောထားတာ ၈လပိုင်းကလို့သိရတယ်" လို့အလုပ်သမားနဲ့နီးစပ်သူက ဆိုပါတယ်။
စက်ရုံရဲ့ All super နဲ့အလုပ်သမားတွေ သြဂုတ်လ ၁၅ရက်မှာ ပြုလုပ်ခဲ့တဲ့ စက်ရုံတွင်းအစည်းအဝေးမှာ လာမယ့် စက်တင်ဘာလကစတင်ပြီး တစ်ရက်တာလုပ်အားခကြေးကို တရားဝင်ပေးထားတဲ့ထောက်ပံ့ကြေးကျပ်နှစ်ထောင်အပါအဝင် တစ်နေ့လုပ်အားခ ၁၁၀၀၀ ကျပ်ပေးမယ်လို့ ပြောဆိုထားတာပါ။ ဒါ့အပြင် တစ်နာရီလုပ်အားခအချိန်ပိုကြေးလည်းတိုးပေးမယ်လို့ All Super မှ ကတိပေးပြောဆိုခဲ့ပါတယ်။
ဒီလိုလုပ်ခလစာတိုးပေးမှာ ဖြစ်တာကြောင့် တစ်ရက်တာ လုပ်ငန်းခွင်ပျက်ကွက်ပါက ရက်မှန်ကြေး ၃၀,၀၀၀ ကျပ်၊ တစ်နေ့တာလုပ်အားခ ၁၁,၀၀၀ကျပ်၊ လုပ်သက်နှစ်ကြေး အားလုံး၊ကျွမ်းကျင်ကြေး ၃၃၀၀ကျပ်၊ အထည်ကြေး တစ်ရက်စာ တို့ကို ဖြတ်တောက်မယ်လို့ အသိပေးခဲ့ပါတယ်။ နောက်ဆက်တွဲအနေနဲ့လည်း ( ၈ ) နာရီကြာလုပ်ဆောင်ရမယ့် အထည်အရည်အတွက်ကို ( ၆ )နာရီနဲ့ အပြီးလုပ်ဆောင်ပေးရတာ၊ လုံခြုံရေးတင်းကြပ်စွာ စစ်ဆေးတာကို ခံရသလို အမျိုးသမီးတွေပါမကျန် ကိုယ်ထိလက်ရောက်စစ်ဆေးခံရတာ၊ အိမ်သာသွားဖို့ စက်လိုင်းတစ်လိုင်းကို ကတ်သုံးကတ်သာ ထုတ်ပေးထားပြီး ကတ်ပါမှသာ အိမ်သာသွားခွင့်ပြုတာတွေကို စက်ရုံဘက်မှ တင်းတင်းကြပ်ကြပ်ပြုလုပ်ခဲ့တယ်လို့ သိရပါတယ်။
အလုပ်သမားများအနေနဲ့ လစာတိုးပေးမယ်ဆိုတာကြောင့် တင်းကြပ်မှုတွေကိုသည်းခံကာ အလုပ်လုပ်ကိုင်လာခဲ့ကြတာဖြစ်ပါတယ်။ စက်တင်ဘာလ လစာထုတ်ခါနီးမှာတော့ လစာထုတ်ရက်မရောက်မီ နှစ်ရက်အလို အောက်တိုဘာလ ၃ ရက်နေ့မှာ ထပ်တိုးလစာကို မပေးနိုင်ဘူးလို့ စက်ရုံ Super မှ ပြောဆိုခဲ့တာဖြစ်ပါတယ်။
အဆိုပါAll super က"၆၈၀၀ နဲ့ပဲပေးမယ်။ တိုင်ချင်တဲ့နေရာတိုင် လိုက်ရှင်းမယ်။ အဖမ်းခံရမယ်ဆိုရင်လည်းအဖမ်းခံလိုက်မယ်။ ကျေနပ်ရင် မနက်ဖြန် အလုပ်လာဆင်း၊လက်မှတ်ထိုး၊ ပေးတဲ့လစာကိုယူ၊ မဆင်းနိုင်ရင် မလာနဲ့။ "လို့ စက်ရုံ အလုပ်ရှင်ကပြောဆိုခဲ့စကားကို Super က ပြန်လည်ပြောပြခဲ့တာလို့ သိရပါတယ်။
စက်ရုံဘက်က ပျက်ကွက်တာနဲ့ ပတ်သက်ပြီး ညှိနှိုင်းမှု လုပ်ဆောင်ဖို့ အလုပ်သမားတွေက WCC ကိုစာတင်တောင်းဆိုထားပြီး အလုပ်ရှင်ကညှိနှိုင်းရာမှာ အလုပ်သမားတွေကို ဝင်ခွင့်မပေးတာကြောင့် အလုပ်သမားတွေအနေနဲ့ ညှိနှိုင်းခွင့်ရရှိဖို့တောင်းဆိုနေတယ်လို့ သိရပါတယ်။
အခုလို အလုပ်သမားေတွအပေါ်လစာတိုးပေးမယ်ဆိုကာ မက်လုံးပေးခိုင်းစေပြီး အလုပ်သမားများရဲ့လုပ်အားခများကို ခေါင်းပုံဖြတ်တာဟာ အလုပ်သမားတွေရဲ့ ရပိုင်ခွင့်ကို ချိုးဖောက်တာ၊ အလုပ်သမားတွေ အပေါ် လိမ်လည်လှည့်ဖျားကာ လုပ်အားညှစ်ထုတ် ခိုင်းစေပြီး အလုပ်သမားများ၏ လုပ်အားကို အရယူခဲ့တဲ့ Golden Colour Fashion (Myanmar) ကုမ္ပဏီရဲ့ ဆိုးဝါးတဲ့ လုပ်ရပ်ကို မှတ်တမ်းတင်တာနဲ့ တိုင်ကြားရေး ယန္တရား အရအရေးယူ အပြစ်ပေးတာတွေ လုပ်ဆောင်နိုင်ဖို့ ဆောင်ရွက်သွားမယ်လို့လည်း STUM ကဆိုထားပါတယ်။
စက်ရုံဟာ အချိန်ပိုမတရားခေါ်ယူတာ၊ သမဂ္ဂဖြိုခွဲတာနဲ့လုပ်ငန်းခွင်တွင်း ခွဲခြားဆက်ဆံ တာတွေ ဆက်တိုက်ကျူးလွန်နေတာဖြစ်ပြီး လက်ရှိမှာ KAPPA , MEDICINE, KoToN အစရှိတဲ့ brands ကိုချုပ်လုပ်နေတာဖြစ်ပါတယ်။
