မြန်မာစစ်တပ်ကို အရေးယူပေးဖို့ ILO ကို ပြည်တွင်းပြည်ပ အထည်ချုပ်အလုပ်သမားတွေက တောင်းဆို လိုက်တယ်လို့ မြန်မာနိုင်ငံလုံးဆိုင်ရာအလုပ်သမားသမဂ္ဂများအဖွဲ့ချုပ်( CTUM Myanmar) က ဒီကနေ့ ဩဂုတ် ၂၉ ရက်က ထုတ်ပြန်ထားပါတယ်။
မြန်မာနိုင်ငံက စက်မှုလုပ်ငန်းခွင်အတွင်း မြန်မာစစ်တပ်က လက်နက်နဲ့ ခြိမ်းခြောက် ဖိနိုပ်ခံတာနဲ့ စက်မှုဇုန် စီမံခန့်ခွဲရေးကော်မတီက အခုနှစ် သြဂုတ်လအတွင်း အလုပ်သမားတွေရဲ့ သတင်းအချက်အလက်တွေကို ကောက်ခံတာတွေ ပြုလုပ်နေပြီး အဓမ္မ စစ်မှုထမ်းခိုင်းစေမှုအတွက် အလုပ်သမားတွေက စိုးရိမ်ချက်တွေ ရှိတယ်လို့ ဖော်ပြထားပါတယ်။
အခြေခံ အထည်ချုပ် အလုပ်သမားများအနေနဲ့ ပြည်သူတွေအပေါ် အကြောက်တရားနဲ့ ဖိနိုပ်အုပ်ချုပ်နေတဲ့ အာဏာရှင် စစ်တပ်ကို အပြည်ပြည်ဆိုင်ရာအလုပ်သမားရေးရာအဖွဲ့ ILO က ပုဒ်မ ၃၃ နဲ့ အရေးယူပေးဖို့ တောင်းဆိုတဲ့ ကမ်းပိန်း ပြုလုပ်ခဲ့တယ်လို့ သိရပါတယ်။
စစ်အာဏာရှင်အောက်မှာ အလုပ်သမားအခွင့်အရေး ချိုးဖောက်မှုနဲ့ ရင်ဆိုင်နေရပြီး ၂၀၂၄ခုနှစ်၊ နိုဝင်ဘာလမှာ ကျင်းပမဲ့ ILO အုပ်ချုပ်ရေးအဖွဲ့ အစည်းအဝေးမှာ စစ်အုပ်စုကို ပုဒ်မ ၃၃ အရ အရေးယူဖို့ ဆွစ်ဇလန်နိုင်ငံ၊ ဂျနီဗာမြို့ရှိ ILO ရုံးချုပ်မှာ ဆွေးနွေးမှာ ဖြစ်ပြီး စစ်ကောင်စီ ဖြုတ်ချရေး ဆောင်ရွက် သွားမယ်လို့ လည်း ထုတ်ပြန်ထားတာဖြစ်ပါတယ်။
