Myanmar Labour News မှာ ပြီးခဲ့တဲ့ တစ်ပတ်တာအတွင်း ဖော်ပြခဲ့တဲ့ အလုပ်သမား ရေးရာ သတင်းတွေ၊ ရွှေ့ပြောင်းအလုပ်သမားဆိုင်ရာ သတင်းအချက်အလက်တွေနဲ့ လတ်တလော ဖြစ်ပေါ်နေတဲ့ ပြည်တွင်းသတင်း  အခြေအနေတွေကို အနှစ်ချုပ်ဖော်ပြပေးသွားမှာ ဖြစ်ပါတယ်။

ဒီလိုတစ်ပတ်တာသတင်းတွေကို စုစည်းဖော်ပြရတဲ့ ရည်ရွယ်ချက်ကတော့ ပြည်သူတွေ၊ အလုပ်သမားတွေ တွေ့ကြုံနေရတဲ့ အခက်အခဲတွေ၊ အခြေအနေတွေကို အချိန်တိုတွင်း သိရှိနိုင်ဖို့ ရည်ရွယ်တာပဲ ဖြစ်ပါတယ်။

ဩဂုတ်လ (၅) ရက်

-(၈) လေးလုံး အရေးတော်ပုံမှာ ကျဆုံးခဲ့သူတွေကို အမှတ်တရသတိရခြင်းဖြင့် ထိုင်းနိုင်ငံ၊ မြန်မာနယ်စပ် တစ်နေရာမှာ အခမ်းအနားကျင်းပခဲ့ပါတယ်။

-နိုင်ငံကူးလက်မှတ် PV နဲ့ ပြည်ပထွက်ခွာတာကို ရန်ကုန်လေဆိပ်မှာ စိစစ်တာတွေကို တင်းတင်းကျပ်ကျပ် လုပ်ဆောင်နေပါတယ်။

-BOHUA Fashion အထည်ချုပ်စက်ရုံမှာ အချိန်ပိုတွေကို အတင်းအကြပ်ဖိအားပေးခေါ်ယူနေတယ်လို့ အလုပ်သမားတွေက ပြောပါတယ်။

-ဂျပန်ကုမ္ပဏီ (၁၄၀၀) ကျော်က မြန်မာအလုပ်သမား (၁၃၀၀) ကျော် ထပ်မံခေါ်ယူဖို့ ကမ်းလှမ်းစာပို့ထားပါတယ်။
-မုတ်သုံလေ အားကောင်းပြီး မိုးရွာသွန်းမှုများနေတာကြောင့် မြစ် ၅ စင်းမှာ မြစ်ရေမှာ စိုးရိမ်ရေမှတ်ထက် ကျော်လွန်နေပါတယ်။

-ထိုင်းနိုင်ငံ၊ မဟာချိုင်မှာ စက္ကူစက်ရုံပိတ်သိမ်းတာကြောင့် အလုပ်လက်မဲ့ဖြစ်သွားတဲ့ မြန်မာအလုပ်သမား (၃၀၀) ကျော်ဟာ နစ်နာကြေးစုစုပေါင်း ဘတ်(၁၈)သန်း ရရှိခဲ့ပါတယ်။

-လူမှုကွန်ရက်မီဒီယာတွေမှာ ပြန့်နှံ့နေတဲ့ သတင်းအချက်အလက်တွေကို ဘယ်လိုအကျိုးရှိရှိရယူမလဲဆိုတာကို လူမှုမီဒီယာသုတေသ ကိုကျော်ကြီး (သာကေတ)က ဆွေးနွေးမှုတွေ လုပ်ဆောင်ထားတဲ့ အဓိကာရ ပေါ့ကတ်အစီစဉ်ကို ထုတ်လွှင့်ခဲ့ပါတယ်။

-အာဏာသိမ်းစစ်ခေါင်းဆောင် မင်းအောင်လှိုင်က “ယာယီသမ္မတ”လွှဲပြောင်းတာဟာ ၂၀၀၈ ဖွဲ့စည်းပုံဥပဒေပါ ပြဌာန်းချက်တွေနဲ့ မကိုက်ညီတဲ့အခြေအနေတွေကို ဆွေးနွေးထားတဲ့ ပေါ့ကတ်အစီစဉ်ကို ထုတ်လွှင့်ခဲ့ပါတယ်။

ဩဂုတ်လ (၆) ရက်

- အလုပ်သမား (၂၀၀၀) ကျော်ကို အလုပ်အကိုင်အခွင့်အလမ်း ပေးနိုင်မယ့် လုပ်ငန်းအသစ် (၅) ခုခွင့်ပြုပေးထားတယ်လို့ စစ်ကောင်စီလက်အောက်ခံ နိုင်ငံပိုင်သတင်းစာမှာ ဖော်ပြပါထားပါတယ်။

-Chu Yang (Myanmar) စက်ရုံ အလုပ်သမားသမဂ္ဂခေါင်းဆောင် အလုပ်ထုတ်ခံရမှု အလုပ်ရှင်၊ အလုပ်သမား ညှိနှိုင်းတာတွေ လုပ်ဆောင်နေတယ်လို့ ဆိုပါတယ်။

-ဂျပန်ဘာသာစကား အရည်အချင်းစစ်စာမေးပွဲ (JLPT) ကို ဒီဇင်ဘာလ (၁) ရက်နေ့မှာ ပြုလုပ်သွားမယ်လို့ ကြေညာထားပါတယ်။

-ပြည်ဝင်ခွင့်ပြဿာနာကြောင့် တရုတ်နိုင်ငံကို တရားဝင်လုပ်သားပို့တာ ရပ်နားထားပေမယ့် အွန်လိုင်းကနေ တရားမဝင် လုပ်သားခေါ်ယူတာတော့ များနေပါတယ်။

-စစ်ကောင်စီကို ILO ပုဒ်မ  (၃၃) အရ အမြန်ဆုံးအရေးယူ ဆောင်ရွက်ဖို့ကို အလုပ်သမားအရေးလှုပ်ရှားသူတွေက ဆွေးနွေးတာတွေ လုပ်ဆောင်ခဲ့ပါတယ်။

-PEPSI အချိုရည်စက်ရုံ CEO ၊ HR နဲ့ ကုမ္ပဏီကို ထပ်တိုးတရားစွဲဆွဲမှုကို ဩဂုတ်လ (၁၆) ရက်ကို ပြန်လည် ချိန်းဆို ထားပါတယ်။

-အောင်လံမြို့မှာ ခွေးရူးကိုက်ခံရသူတွေရှိလာတာကြောင့် လေလွင့်တိရစ္ဆာန်တွေကို စည်ပင်သာယာက သတ်မှတ်ချက်တွေနဲ့အညီ ဆောင်ရွက်သွားမယ်လို့ ဆိုပါတယ်။

-လက်ပံတောင်းဒေသမှာ “၈” လေးလုံးအကြို လူထုလှုပ်ရှားမှု လုပ်ဆောင်ခဲ့ပါတယ်။

-Ooredoo Myanmar Limited မှာ အလုပ်လုပ်ကိုင်နေတဲ့ ဝန်ထမ်းတစ်ဦး မတရားသဖြင့် အလုပ်ထုတ်ခံခဲ့ရ တာကြောင့် တိုင်ကြားမှု လုပ်ဆောင်ထားပါတယ်။

-(၃၆) နှစ်မြောက် ၈ လေးလုံးအရေးတော်ပုံ အထိမ်းအမှတ်အဖြစ် ရန်ကုန်သပိတ်အင်အားစုတွေက လှုပ်ရှားမှု လုပ်ဆောင်ခဲ့ပါတယ်။

-ပြီးခဲ့တဲ့ ဇူလိုင်လတွင်း အလုပ်သမားအခွင့်အရေး ချိုးဖောက်ခံရတဲ့ ဒေတာအချက်အလက်တွေကို လစဉ်ရီပို့အဖြစ်  Myanmar Labour News က စုစည်းဖော်ပြထားပါတယ်။

ဩဂုတ်လ (၇) ရက်

-မူဆယ်မှာ ယွမ်ငွေအစား ကျပ်ငွေနဲ့လုပ်ခလစာ ပေးချေလာတာကြောင့် အလုပ်သမားတွေမှာ နစ်နာမှုတွေ ရှိနေပါတယ်။

ဩဂုတ်လ (၈) ရက်

-(၈)လေးလုံး အထိမ်းအမှတ်နေ့မှာ မြန်မာနိုင်ငံ ဆောက်လုပ်ရေးနှင့် သစ်လုပ်ငန်း အလုပ်သမားသမဂ္ဂအဖွဲ့ချုပ် (BWFM) က ကမ်ပိန်းပြုလုပ်ခဲ့ပါတယ်။

-(၈)လေးလုံးအရေးတော်ပုံ (၃၆) နှစ်ပြည့်အထိမ်းအမှတ်အဖြစ် စစ်အာဏာရှင် ဆန့်ကျင်ရေး ရန်ကုန်အင်အားစုက ဘန်နာချိတ်ဆွဲခဲ့ပါတယ်။

-ရန်ကုန်မြို့သပိတ်အဖွဲ့တွေက (၈)လေးလုံး (၃၆) နှစ်ပြည့် လှုပ်ရှားတာတွေ လုပ်ဆောင်ခဲ့ပါတယ်။

-ရန်ကုန်မြို့ရဲ့ နေရာတော်တော်များများမှာ အဖွဲ့အစည်း အသီးသီးက (၈) လေးလုံးအရေးတော်ပုံ (၃၆) နှစ်ပြည့် အထိမ်းအမှတ်ကို လုပ်ဆောင်ခဲ့ကြပါတယ်။

-ပြည်ပရောက် မြန်မာနိုင်ငံသားတွေရဲ့ သား၊ သမီး မွေးစာရင်းလက်မှတ်တွေကို NUG အစိုးရထံမှာ လျှောက်ထားထုတ်ယူနိုင်ပါတယ်။

-စက်သုံးဆီကို ဆီဆိုင်တွေမှာ အလွယ်တကူ ဝယ်မရတာကြောင့် ပြင်ပဈေးကွက်မှာ ဝယ်ယူအသုံးပြုနေရပြီး ကယ်ရီလုပ်သားတွေ ဝင်ငွေထိခိုက်လာပါတယ်။

-ထိုင်းနိုင်ငံရှိ ဆောက်လုပ်ရေးလုပ်ငန်းခွင်တစ်ခုမှာ လုပ်အားခ လေးလစာမပေးတဲ့အပြင် အထောက်အထားတွေပါ သိမ်းထားခံရလို့ မြန်မာအလုပ်သမားတွေက တိုင်ကြားမှု လုပ်ဆောင်ထားပါတယ်။

-ပို့ကုန်ရငွေပမာဏာရဲ့ (၃၅) ရာခိုင်နှုန်းအစား (၂၅) ရာခိုင်နှုန်းကိုသာ ကျပ်ငွေလဲလှယ်ဖို့ စစ်ကောင်စီလက်အောက် ခံ ဗဟိုဘဏ်က သတ်မှတ်ထုတ်ပြန်ပါတယ်။

-တိုင်းနဲ့ပြည်နယ် (၅)ခုက ရေဘေးသင့်သူ တစ်သိန်းကျော်ကို ကုလသမဂ္ဂ ကမ္ဘာ့စားနပ်ရိက္ခာအဖွဲ့ WFP က အရေးပေါ်စားနပ်ရိက္ခာတွေ ကူညီပေးနေတယ်လို့ သတင်းထုတ်ပြန်ထားပါတယ်။

-ထိုင်းနိုင်ငံရေး အပြောင်းအလဲကြောင့် တရားမဝင်အလုပ်သမားတွေကို ပန်းရောင်ဘတ်ကတ် ပြုလုပ်ပေးမယ့် အစီအစဉ်ဟာ နှောင့်နှေးနိုင်တယ်လို့ သုံးသပ်မှုတွေ ရှိပါတယ်။

ဩဂုတ်လ (၉) ရက်

-ကျေးလက်တော်လှန် ပြည်သူ့အသံသပိတ်စစ်ကြောင်းက ၈လေးလုံး (၃၆) နှစ်မြောက် လူထုသပိတ်လှုပ်ရှားမှု လုပ်ဆောင်ခဲ့ပါတယ်။

အေဂျင်စီတွေကတဆင့် ပြည်ပအလုပ်ခေါ်စာတွေ ရှိနေပေမယ့် တရားဝင်သွားရောက်မယ့် လုပ်သားတွေ ရှားပါးနေပါတယ်။

-ဂျပန်မှာ  မြေငလျှင် ပြင်းထန်စွာ လှုပ်ရှားမှုကြောင့် အကူအညီလိုအပ်တဲ့ မြန်မာနိုင်ငံသားတွေ သံရုံးကို ဆက်သွယ်ဖို့ သတင်းထုတ်ပြန်ထားပါတယ်။

-မလေးရှားနိုင်ငံ၊ ဂျိုဟိုးပြည်နယ်ရှိ စက်ရုံ(၂)ရုံက အထောက်အထားမဲ့ မြန်မာအမျိုးသမီးအလုပ်သမား (၆၈) ဦး အဖမ်းခံခဲ့ရပါတယ်။

-ပြင်ပဈေးကွက်မှာ တစ်ဒေါ်လာကို ကျပ် (၆၀၀၀) ကျော်ထိ ဈေးမြင့်တက်လာပါတယ်။

-ပြည်ပလုပ်သား မိသားစုထံ ငွေလွှဲပို့စာရင်း တင်ပြဖို့ အေဂျင်စီတွေကို နေပြည်တော်အလုပ်သမားရုံးကို အလှည့်ကျ ခေါ်ယူစစ်ဆေးမယ်လို့ အကြောင်းကြားထားပါတယ်။

-ဆောက်လုပ်ရေး လုပ်ငန်းခွင်မှာ လုပ်အားခ ဘတ်(၁၅)သိန်းခန့် မပေးလို့ ထိုင်းအလုပ်ရှင်ကို တိုင်ကြားမှုတွေ လုပ်ဆောင်ထားပါတယ်။

-လုပ်ခလစာမက်လုံးပေးပြီး ကုမ္ပဏီအသွင်ဖန်တီးကာ လူငယ်တွေကို စစ်မှုထမ်ကို ခေါ်ယူတာတွေ လုပ်ဆောင်နေပါတယ်။

-ပြည်တွင်းမှာ သတ်မှတ်ထားတဲ့ တစ်နေ့လုပ်အားခဟာ တစ်ဒေါ်လာပေါက်ဈေးအောက်မှာ ရှိနေပါတယ်။

-စားအုန်းဆီ အိမ်အရောက်ပို့စနစ်နဲ့ ရောင်းချမှု ယာယီရပ်ဆိုင်းပြီး  ပြင်ပပေါက်ဈေး တစ်ပိသာ ကျပ် (၁၄၀၀၀)အထက်ကို ရောက်ရှိနေပါတယ်။

ဩဂုတ်လ (၁၀) ရက်

-အလုပ်သမားတွေရဲ့ တစ်ရက်တာ (၈) နာရီ လုပ်အားခကို ထောက်ပံ့ကြေး ၂၀၀၀ ကျပ်ပေါင်းပြီး ကျပ်(၆၈၀၀) သတ်မှတ်ပေးချေရန် စစ်ကောင်စီ သတ်မှတ်ခဲ့ပါတယ်။

အခုဖော်ပြခဲ့တဲ့ တပတ်တာ သတင်းအနှစ်ချုပ်ကို စုစည်းပေးတာတော့ မမ ဖြစ်ပါတယ်။